Italiya Vazirlar Kengashi koronavirus pandemiyasi va COVID-19’ning yangi shtammi tarqalishi bilan bog‘liq cheklovlarni kuchaytirish to‘g‘risida qaror qabul qildi, deb yozmoqda “Interfaks”.
Iste’foga chiqayotgan bosh vazir Juzeppe Konte Italiya ichida hududlararo harakatlanish uchun qo‘yilgan taqiq 25-fevralga qadar uzaytirilganini e’lon qildi.
Bundan tashqari, 14-fevral, yakshanba kunidan boshlab Abrutsso, Liguriya, Toskana hududlari va Trentino avtonom viloyatidagi epidemiologik vaziyatga “to‘q sariq daraja” beriladi. Natijada ushbu hududlarda bar, restoran va muzeylar yopiladi.
Italiyaning qolgan mintaqalari “sariq” zona bo‘lib qoladi: bar va restoranlar mahalliy vaqt bilan soat 18:00 gacha ochiq, kechasi mamlakatda komendantlik soati hukm suradi.
Jons Hopkins universiteti ma’lumotlariga ko‘ra, COVID-19 pandemiyasi boshlanganidan buyon Italiyada 2,7 millionga yaqin kishida kasallik qayd etilgan. 93 mingdan ortiq bemor infeksiya oqibatida vafot etgan, 2,2 million kishi kasallikdan butunlay sog‘aygan.
Avvalroq Latviya pandemiya tufayli ikki haftaga chegaralarini yopgani haqida xabar berilgandi. Mamlakatga kirish uchun taqiq 11-fevraldan 25-fevralgacha amal qiladi.
Buyuk Britaniyada esa 15-fevraldan boshlab COVID-19 xavfi yuqori bo‘lgan davlatlardan tashrif buyuruvchilar uchun ikki haftalik majburiy karantin joriy etiladi. “Qora ro‘yxat”dagi mamlakatlardan qaytgan fuqarolar o‘n kunni “COVID-mehmonxonalar”da o‘tkazishi kerak.
Izoh (0)