Ijtimoiy tarmoqlarda Samarqand viloyatida to‘rt kishida “COVID-19” aniqlangani, u “britancha” shtamm ekanligi to‘g‘risida xabar tarqaldi. Samarqand viloyat sanitariya-epidemiologik osoyishtalik va jamoat salomatligi boshqarmasi boshlig‘ining o‘rinbosari Latif Rustamovning “Daryo”ga ma’lum qilishicha, Britaniyada aniqlangan koronavirusning yangi turi Samarqandda qayd etilmagan.
Mutaxassisning fikricha, Toshkentda ushbu infeksiya bilan kasallangan 10 yoshli bemor bilan kontaktda bo‘lganlar to‘liq nazorat ostiga olingan. Hozir boshqa hech bir fuqaroda “britancha” shtamm qayd etilmagan, jumladan, Samarqandda ham.
“Sog‘liqni saqlash vazirligi tomonidan ijtimoiy tarmoqlarda muntazam ravishda koronavirusning COVID-19 infeksiyasiga chalinganlar to‘g‘risida kunlik ma’lumot berib borilmoqda. Fuqarolarimiz koronavirusning COVID-19 infeksiyasini ‘britancha’ shtamm infeksiyasi bilan adashtirmasliklarini so‘raymiz”, — dedi Latif Rustamov.
Samarqand viloyat sanitariya-epidemiologik osoyishtalik va jamoat salomatligi boshqarmasi virusologiya laboratoriyasi mudirasi Yulduz Obloqulovaning ma’lum qilishicha, 6-fevral kuni 2571 nafar fuqarodan “COVID-19” uchun namunalar olingan bo‘lib, ushbu fuqarolarning 4 nafarida musbat holat aniqlangan. Bu avvalgi holatlarga qaraganda ijobiy hol hisoblanadi.
“Test namunalari musbat chiqqan fuqarolarda kasallikning yengil formasi bo‘lib, ular hozirda mutaxassislar nazorati ostida uy sharoitida karantinga olinib, davolanmoqda. Biz aholiga qulaylik yaratish maqsadida to‘rtta hududda test namunalari olish markazi tashkil etdik. Payariq, Kattaqo‘rg‘on, Samarqand shahri va viloyat sanitariya-epidemiologik osoyishtalik va jamoat salomatligi boshqarmasida fuqarolar kelib test topshirishlari mumkin”, — dedi Yulduz Obloqulova.
Eslatib o‘tamiz, 30-yanvar kuni koronavirusning “britancha” shtammi O‘zbekistonga kirib kelgani ma’lum bo‘ldi. U 23-yanvar kuni Dubaydan qaytib kelgan 10 yoshli qizchada aniqlangan. SSV esa koronavirusning yangi shtammi aniqlangan qizcha haqida nima uchun 1 haftadan keyin e’lon qilinganiga izoh berdi.
Koronavirusga qarshi kurashish shtabi a’zosi Nurmat Otabekov koronavirusning “britancha” shtammining odamlar orasiga kirishiga yo‘l qo‘yilmaganini ma’lum qilib, U “Karantinga qaytishga umuman asos yo‘q”, — degandi.
Izoh (0)