Maktabgacha ta’lim vazirligida 9-fevral kuni o‘tkazilgan matbuot anjumanida Janubiy Koreyadagi bir qator tashkilotlar O‘zbekiston maktabgacha ta’lim vazirligiga 275 ta aqlli robot taqdim etgani ma’lum qilindi.
“Daryo” muxbirining xabar berishicha, vazirlik bog‘cha tarbiyalanuvchilarida algoritmik fikrlashni rivojlantirish hamda robototexnika va dasturlash ko‘nikmalarini o‘rgatishga mo‘ljallangan pilot loyihasini ishga tushirdi. Loyiha Janubiy Koreyaning robot sanoatini rivojlantirish instituti (KIRIA), Koreya o‘qituvchilar uyushmasi, shuningdek, FRG Korea, Dazzle Edu, Genie Robot va SK Telecom kompaniyalari bilan hamkorlikda amalga oshirilmoqda.
Maktabgacha ta’lim vaziri Agrippina Shinning ta’kidlashicha, loyihaning pilot bosqichi uchun 275 ta Albert va Genibot aqlli robotlari hamda 350 ta o‘quv qo‘llanmasi sovg‘a qilingan.
“Bolalarni bog‘cha davridanoq robototexnika singari kelajak kasblari bilan tanishtirish, ularda bunga qiziqish uyg‘otish maqsadida mazkur loyihaga qo‘l urdik. Koreyalik hamkorlarimiz taqdim etgan robot va o‘quv qo‘llanmalar O‘zbekiston bo‘ylab 55 ta bog‘chaga 5 tadan taqsimlandi. Pilot bosqichida ishtirok etayotgan pedagoglar robotlar bilan ishlash bo‘yicha o‘quv seminarlarida ishtirok etishdi. Kelgusida aqlli robotlar mamlakatimizdagi barcha bog‘chalarga tarqatilishi rejalashtirilmoqda”, — dedi Agrippina Shin.
Vazirlik huzuridagi Axborot va pedagogik texnologiyalar innovatsion markazi direktori Oyatillo Rahmatillayevning aytishicha, Albert va Genibot robotlari 6 yoshdan katta tarbiyalanuvchilarga mo‘ljallangan. Bolaning ongi ayni shu yoshida turli ko‘nikma va bilimlarni o‘zlashtira oladi, shakllanadi.
Birinchi bosqichda bola tayyor kodlash kartalari yordamida o‘yinchoqni harakatlantirishi, ko‘zini miltiratish, gapirish, qo‘shiq kuylash, ma’lum ketma-ketlikdagi amallarni bajarish buyruqlarini berishi mumkin. Shu tarzda u kod bloklarining ishlashini tushunib oladi, algoritmik fikrlashga moslashadi. Yoshi kattaroq bolalar robotni smartfonga ulab, o‘z buyruqlari va algoritmlarini yaratishi mumkin.
“Bog‘chalarda robotlar yordamida o‘qitish uslubi Janubiy Koreyada ijobiy natija ko‘rsatgan. Shu jumladan, Fransiya, Ispaniya, Kosta-Rika va Perudagi maktab va bog‘chalarda ham bu loyihaning pilot bosqichi ishga tushirilgan.
Biz bir yil davomida pilot loyiha samaradorligini monitoring qilib boramiz va oxirida natijalar tahlil qilinadi. Agar loyiha muvaffaqiyatli yakunlansa, respublikaning barcha maktabgacha ta’lim tashkilotlariga mana shunday aqlli robotlar yetkazish ko‘zda tutilmoqda. Bundan tashqari, robotlarning ish funksiyalari imkoniyati cheklangan bolalarga mo‘ljallangan dastur bilan to‘ldiriladi”,— dedi Oyatillo Rahmatillayev.
Rahmatillayevning aytishicha, loyihaning pilot bosqichida robotlar koreyalik hamkorlar tomonidan bepul taqdim etilgan bo‘lsa, keyingi bosqichda davlat budjeti, xalqaro donor tashkilotlar mablag‘lari, imtiyozli kreditlarni jalb qilish rejalashtirilgan.
Izoh (0)