“Hududgaz Samarqand” gaz ta’minoti filiali tomonidan 2021-yilning yanvar oyida o‘tkazilgan tadbirlar davomida shartnoma shartlariga amal qilmay, gaz tarmoqlariga noqonuniy ulanish bo‘yicha 31 ta holat aniqlangan. Bu haqda “Daryo”ga “Hududgaz Samarqand” gaz ta’minoti filiali axborot xizmati ma’lum qildi.
Ma’lum bo‘lishicha, noqonuniy ulanishlar natijasida gaz ta’minoti korxonalariga 393 million 869 ming so‘m zarar yetkazilgan.
“‘Hududgaz Samarqand’ gaz ta’minoti filiali tomonidan yakka tartibdagi xo‘jalik yurituvchi subyektlarning gaz o‘g‘riliklarini aniqlash bo‘yicha nazorat tadbirlari o‘tkazildi. Pastdarg‘om tumanida o‘tkazilgan nazorat tadbirida tumanning ‘Namozgoh’ mahallasida yashovchi fuqaro N.N. o‘zboshimchalik bilan hech qanday hujjatlarsiz noqonuniy ravishda tabiiy gaz tarmog‘iga ulanib olgani aniqlangan. U 7,5 sotix yer maydonida issiqxona tashkil etib, bodring va poliz ekinlari yetishtirib, 3 ta qo‘lbola isitish pechi va 2 ta qo‘lbola isitish qozonining har birida 2 tadan gaz yondirgichdan (gorelka) foydalanib kelgani aniqlandi”, — deyiladi filial axborot xizmati xabarida.
Aytilishicha, iste’molchining gaz tarmog‘iga noqonuniy ulanish holati qayta hisob-kitob qilinib, gaz tarmog‘idan uzilgan. Ushbu issiqxonada noqonuniy foydalanilgan gaz hajmi 57002, 4 metr kubni tashkil etib, gaz ta’minoti tashkilotlariga yetkazilgan zarar miqdori 57 million so‘mni tashkil etgan.
Shuningdek, “Narpaytumangaz” tomonidan o‘tkazilgan tekshiruvlar davomida gaz tarmog‘iga noqonuniy ulanib, ohak ishlab chiqarayotgan tadbirkor ham aniqlangan. Tumangaz ta’minoti bo‘limi xodimlari tomonidan tuzilgan dalolatnomaga ko‘ra, Oqtosh shahri, “Muqimiy” mahallasida yashovchi fuqaro U.N. 2020-yilning 22-dekabr kunidan gaz tarmog‘iga noqonuniy ulanib, ohak pishirish uchun 12 dona qo‘lbola yondirgichdan foydalanib kelgan. Dastlabki hisob-kitoblarga ko‘ra, 13 sutkadagi noqonuniy faoliyati natijasida gaz ta’minoti korxonalariga 31 million 973 ming so‘m zarar yetkazilgan.
Aniqlangan noqonuniy holatlar bo‘yicha to‘plangan barcha materiallar huquqni muhofaza qilish organlariga topshirilgan.
Izoh (0)