Ижтимоий тармоқларда Самарқанд вилоятида тўрт кишида «COVID-19» аниқлангани, у «британча» штамм эканлиги тўғрисида хабар тарқалди. Самарқанд вилоят санитария-эпидемиологик осойишталик ва жамоат саломатлиги бошқармаси бошлиғининг ўринбосари Латиф Рустамовнинг «Дарё»га маълум қилишича, Британияда аниқланган коронавируснинг янги тури Самарқандда қайд этилмаган.
Мутахассиснинг фикрича, Тошкентда ушбу инфекция билан касалланган 10 ёшли бемор билан контактда бўлганлар тўлиқ назорат остига олинган. Ҳозир бошқа ҳеч бир фуқарода «британча» штамм қайд этилмаган, жумладан, Самарқандда ҳам.
«Соғлиқни сақлаш вазирлиги томонидан ижтимоий тармоқларда мунтазам равишда коронавируснинг COVID-19 инфекциясига чалинганлар тўғрисида кунлик маълумот бериб борилмоқда. Фуқароларимиз коронавируснинг COVID-19 инфекциясини ‘британча’ штамм инфекцияси билан адаштирмасликларини сўраймиз», — деди Латиф Рустамов.
Самарқанд вилоят санитария-эпидемиологик осойишталик ва жамоат саломатлиги бошқармаси вирусология лабораторияси мудираси Юлдуз Облоқулованинг маълум қилишича, 6 февраль куни 2571 нафар фуқародан «COVID-19» учун намуналар олинган бўлиб, ушбу фуқароларнинг 4 нафарида мусбат ҳолат аниқланган. Бу аввалги ҳолатларга қараганда ижобий ҳол ҳисобланади.
«Тест намуналари мусбат чиққан фуқароларда касалликнинг енгил формаси бўлиб, улар ҳозирда мутахассислар назорати остида уй шароитида карантинга олиниб, даволанмоқда. Биз аҳолига қулайлик яратиш мақсадида тўртта ҳудудда тест намуналари олиш маркази ташкил этдик. Пайариқ, Каттақўрғон, Самарқанд шаҳри ва вилоят санитария-эпидемиологик осойишталик ва жамоат саломатлиги бошқармасида фуқаролар келиб тест топширишлари мумкин», — деди Юлдуз Облоқулова.
Эслатиб ўтамиз, 30 январь куни коронавируснинг «британча» штамми Ўзбекистонга кириб келгани маълум бўлди. У 23 январь куни Дубайдан қайтиб келган 10 ёшли қизчада аниқланган. ССВ эса коронавируснинг янги штамми аниқланган қизча ҳақида нима учун 1 ҳафтадан кейин эълон қилинганига изоҳ берди.
Коронавирусга қарши курашиш штаби аъзоси Нурмат Отабеков коронавируснинг «британча» штаммининг одамлар орасига киришига йўл қўйилмаганини маълум қилиб, У «Карантинга қайтишга умуман асос йўқ», — деганди.
Изоҳ (0)