Toshkentdagi 295-maktabda O‘zbekiston bo‘ylab maktab va universitetlarda dars berish uchun AQShdan tashrif buyurgan 27 nafar ingliz tili o‘qituvchisi va olimlardan iborat guruhni kutib olish marosimi bo‘lib o‘tdi. Unda xalq ta’limi vaziri Sherzod Shermatov va AQShning O‘zbekistondagi elchisi Deniyel Rozenblyum ishtirok etdi, deb xabar bermoqda “Gazeta.uz” AQSh elchixonasi matbuot xizmatiga tayanib.
Qayd etilishicha, ushbu guruh yanvarda kelgan bo‘lib, ikki haftalik karantinda bo‘lgan. Amerikalik o‘qituvchilar guruhi koronavirus pandemiyasi boshlangandan buyon AQShning Markaziy Osiyoga tashrif buyurgan ilk almashuv dasturi ishtirokchilaridir.
Aksariyat o‘qituvchilar mahalliy o‘qituvchilar davrasiga qo‘shilib, sinf darslarida bevosita ishtirok etadi. Guruhning yetti nafar a’zosi English Speaking Nation dasturi doirasidagi “Murabbiy-trenerlar” pilot loyihasida qatnashadi.
Dasturdan maqsad — O‘zbekiston o‘rta maktablaridagi chet tili o‘qituvchilariga kasbiy rivojlanish va malaka oshirish imkoniyatini berish. U AQSh elchixonasi granti asosida Xalq ta’limi vazirligi bilan hamkorlikda Amerika kengashlari tomonidan amalga oshiriladi.
Xalq ta’limi vazirligining ma’lum qilishicha, ushbu mutaxassislar O‘zbekistonning Toshkent, Qashqadaryo, Andijon, Samarqand, Buxoro, Xorazm, Namangan, Surxondaryo, Farg‘ona, Jizzax, Navoiy viloyatlari, Toshkent shahri va Qoraqalpog‘iston Respublikasida faoliyat olib borishi rejalashtirilgan.
Marosimda Xalq ta’limi vaziri Sherzod Shermatov AQShdan kelgan o‘qituvchilar ingliz tilini o‘rgatishni mahalliy darajada yaxshilab, English Speaking Nation loyihasini amalga oshirishda yaqindan yordam berishiga umid bildirgan.
O‘zbekistonda English Speaking Nation dasturi o‘tgan yilning mart oyida ishga tushirilgan edi. Uch yil davomida 15 mingdan ortiq o‘qituvchilar treningdan o‘tadi.
Izoh (0)