Тошкентдаги 295-мактабда Ўзбекистон бўйлаб мактаб ва университетларда дарс бериш учун АҚШдан ташриф буюрган 27 нафар инглиз тили ўқитувчиси ва олимлардан иборат гуруҳни кутиб олиш маросими бўлиб ўтди. Унда халқ таълими вазири Шерзод Шерматов ва АҚШнинг Ўзбекистондаги элчиси Дениел Розенблюм иштирок этди, деб хабар бермоқда «Gazeta.uz» АҚШ элчихонаси матбуот хизматига таяниб.
Қайд этилишича, ушбу гуруҳ январда келган бўлиб, икки ҳафталик карантинда бўлган. Америкалик ўқитувчилар гуруҳи коронавирус пандемияси бошлангандан буён АҚШнинг Марказий Осиёга ташриф буюрган илк алмашув дастури иштирокчиларидир.
Аксарият ўқитувчилар маҳаллий ўқитувчилар даврасига қўшилиб, синф дарсларида бевосита иштирок этади. Гуруҳнинг етти нафар аъзоси English Speaking Nation дастури доирасидаги «Мураббий-тренерлар» пилот лойиҳасида қатнашади.
Дастурдан мақсад — Ўзбекистон ўрта мактабларидаги чет тили ўқитувчиларига касбий ривожланиш ва малака ошириш имкониятини бериш. У АҚШ элчихонаси гранти асосида Халқ таълими вазирлиги билан ҳамкорликда Америка кенгашлари томонидан амалга оширилади.
Халқ таълими вазирлигининг маълум қилишича, ушбу мутахассислар Ўзбекистоннинг Тошкент, Қашқадарё, Андижон, Самарқанд, Бухоро, Хоразм, Наманган, Сурхондарё, Фарғона, Жиззах, Навоий вилоятлари, Тошкент шаҳри ва Қорақалпоғистон Республикасида фаолият олиб бориши режалаштирилган.
Маросимда Халқ таълими вазири Шерзод Шерматов АҚШдан келган ўқитувчилар инглиз тилини ўргатишни маҳаллий даражада яхшилаб, English Speaking Nation лойиҳасини амалга оширишда яқиндан ёрдам беришига умид билдирган.
Ўзбекистонда English Speaking Nation дастури ўтган йилнинг март ойида ишга туширилган эди. Уч йил давомида 15 мингдан ортиқ ўқитувчилар тренингдан ўтади.
Изоҳ (0)