Hindistonda muzlik ko‘chishi oqibatida halok bo‘lganlar soni 19 nafarga yetdi. Bu haqda Chamoli okrugi politsiyasi Twitter’da ma’lum qildi.
“Bugungi kunga kelib, kechagi favqulodda vaziyat natijasida 202 ga yaqin odam bedarak yo‘qolgan, 19 kishining jasadi turli joylardan olib chiqilgan. Ushbu qayg‘uli soatlarda ma’muriyat siz bilan. Iltimos, hamkorlikni davom ettiring. Qutqaruv ishlari qizg‘in davom etmoqda”, — deyiladi xabarda.
Vazirlikning qo‘shimcha qilishicha, yo‘qolganlarni qidirish davom etmoqda, qidiruv tunda ham to‘xtatilmagan. Yo‘qolganlarning aksariyati ishchilar, deb qayd etmoqda “kp.ru” sayti.
Hodisa Uttaraxand shtatida 7-fevralda yuz bergan. Nandadev tog‘idan muzli massalar ko‘chib, Himolay tog‘lari etagidagi Dhauligang va Alaknanda daryolari o‘zani orqali pastga harakatlangan va toshqinlarni keltirib chiqardi.
Natijada, ishchilar bilan birga yuvilib ketgan va tabiiy ofatning eng kuchli zarbasini olgan Rishi Ganga GESi butunlay vayron bo‘ldi, deya ma’lum qildi “360” telekanali. Bundan tashqari, daryoning quyi qismida uchta ko‘prik va turar-joy binolari vayron bo‘lgan. Rasmiylar bir nechta qishloq aholisini evakuatsiya qilmoqda.
Rishi Ganga GESida ishlagan bir necha ishchi bedarak yo‘qolgan. Uttaraxand bosh kotibi Om Prakashning aytishicha, Chamoli okrugidagi toshqinda 100 nafardan 150 nafargacha kishi halok bo‘lgan bo‘lishi mumkin.
Izoh (0)