Германияда Навальний яшаган вилланинг эгаси «Россия 1» телеканали журналистларини ёлғон маълумот берганликда айблади

Германияда россиялик сиёсатчи Алексей Навальний ижарага олган Фрайбургдаги икки қаватли уйнинг эгаси вилла ҳақида лавҳани тасвирга туширган «Россия 1» телеканали журналистлари у ерга ёлғон гапириб кириб олганини маълум қилди. Бу ҳақда «Дожд» телеканали хабар берган.

Исмини ошкор этишни истамаган уй эгаси «Россия 1» телеканалининг тасвирга олиш гуруҳи аъзолари ўзларини бельгиялик сайёҳлар деб таништириб, виллани дам олиш кунлари учун ижарага олган. Лавҳа муаллифи Анастасия Попова Боурт француз фамилиясидан фойдаланиб, вилла эгасини алдаган. Шунингдек, «Дожд» нашрига интервью берган одамнинг россиялик журналистларни танимаганлигини айтиб ўтган. Унинг сўзларига кўра, «Россия 1» тасвирга олиш гуруҳи кузатувни яширин камера воситасида амалга оширган.

Лавҳа эфирга кетганидан кейин уй эгаси Германия ҳуқуқ-тартибот идораларига мурожаат қилган.

«Яширин камера воситасида тасвирга тушириш жиноий жавобгарликка сабаб бўладиган ҳаракатлардан бири», — дея вазиятга муносабат билдирган Алексей Навальнийнинг сайловчилар штаби раҳбари Леонид Волков.

Шунингдек, Волковнинг қайд этишича, «Россия 1» телеканалида эфирга берилган лавҳада уй ижарасининг нархи икки баравар ошириб кўрсатилган.

«Ижара учун 15 580 евро тўланган», — деган Навальнийнинг дўсти, тадбиркор Евгений Чичваркин.

Телеканалдаги лавҳада уйни ижарага олишга 30 минг евродан кўпроқ маблағ сарф қилингани ҳақида маълумот берилган.

7 февралда «Россия 1» телеканали «Вести недели» дастурида Алексей Навальний яшаган Германиядаги вилла ҳақида лавҳа эфирга берилган. Журналист Анастасия Попова мазкур уйда ҳашаматли иккита ётоқхона борлиги, кофе тайёрлайдиган машинали ошхона ва чангютгичли тозалаш хонаси мавжудлигини таъкидлаганди.

Ундан олдин Алексей Навальнийнинг Коррупцияга қарши кураш фонди томонидан эълон қилинган «Путин учун қурилган қаср» суриштирувида Геленжик яқинида Идокопос бурнидаги Прасковеевка қишлоғида камида 100 миллиард рубллик қаср жойлашгани, у Россия президенти учун давлат ва хусусий компаниялар пулларига қурилгани, у ер учиш тақиқланган ҳудуд эканлиги, шунингдек, қасрга денгиз томондан сузиб бориб ҳам бўлмаслиги баён этилганди. Путин ушбу суриштирувдан кейин Коррупцияга қарши кураш фонди (ККФ) томонидан тилга олинган Геленжикдаги қасрга на у ва на унинг қариндошлари эгалик қилишини билдирган.