5-fevral kuni Prezident Shavkat Mirziyoyev kutilmaganda Farg‘ona shahridagi “Shodiyona” mahallasiga borib, mahalla oralab yurgani va aholi bilan uchrashgani to‘g‘risida xabar berilgandi. Prezident matbuot xizmati tomonidan taqdim etilgan “Maxsus rakurs” ko‘rsatuvining navbatdagi sonida davlat rahbari mahalla idorasi binosi bilan tanishish istagini bildirgani, ko‘p qavatli turar joy binolarining aholisi bilan suhbatlashganini ko‘rish mumkin.
Mahalla yo‘llarining nosozligi sababli davlat rahbari Avtomobil yo‘llari davlat qo‘mitasi raisi Abdurahmon Abduvaliyevga tanbeh bergan.
“Mana shu yo‘llarga kim javob berishi kerak? [qo‘mita raisi ushbu savolga “O‘zi bitta odam, biz javob beramiz” deya javob qaytargan] Shuncha yonimda yurgan odamsan, nega shuni menga aytmaysan. Sharmandalik emasmi bu?! Yo‘llar sifatini qara… Ichkarini qara… Mayli, tumanlarda hech balo qilmayapsan, shahardachi? Men aytmasam nega qilmaysan shuni? To‘rt yildan buyon yonimda yuribsan-ku…
Abdurahmon Abduvaliyev ayb o‘zlarida ekanligini tan olgan. Prezident esa nima uchun haligacha o‘zgarish bo‘lmaganini, bu mahalladan ketishi bilan yana “eski hammom, eski tos” bo‘lishini ta’kidlab o‘tgan.
Avvalroq Prezident Shavkat Mirziyoyevning Farg‘ona viloyatiga tashrifi davomida Quva, Yozyovon va O‘zbekiston tumanlari hokimlari, shuningdek, Farg‘ona shahri “to‘rtligi” vazifasidan ozod qilingani haqida xabar berilgan edi.
Izoh (0)