O‘zbekiston Tashqi ishlar vazirligi Rossiyadagi oliy ta’lim muassasalarida tahsil olayotgan talabalarga ogohlantirish bilan chiqdi.
Ma’lum qilinishicha, Rossiya Ta‘lim va ilm-fan vazirining buyrug‘i bilan 8-fevraldan boshlab ushbu vazirlik huzuridagi oliy o‘quv yurtlarida kunduzgi o‘qish jarayoni boshlash ko‘zda tutilgan. Shu sababli “Rossiyaga qaytish istagida bo‘lgan o‘zbekistonlik talabalarning turli soxta hujjatlar, shu jumladan, chegarani kesib o‘tishda yordam berish uchun Rossiya oliy o‘quv yurtlari nomidan soxta taklif xatlari tayyorlashga ixtisoslashgan shubhali shaxslarga murojaat qilish holatlari uchramoqda”.
Bundan tashqari, idora ma’lumotlariga ko‘ra, ijtimoiy tarmoqlar va messenjerlarda O‘zbekistondan Rossiyaga charter reysiga talabalar ro‘yxati tuzilayotgani haqidagi ma‘lumotlar tarqalgan.
“Bu Rossiya hukumatining xorijiy fuqarolari va fuqaroligi yo‘q shaxslarning mamlakat hududiga kirishini vaqtincha cheklash to‘g‘risidagi qarori talablariga zid. Hozirgi vaqtda Rossiya oliy o‘quv yurtlarida tahsil olayotgan o‘zbekistonlik talabalar Rossiya hududiga to‘sqinliklarsiz kirish huquqiga ega fuqarolar tasnifiga kirmaydi”, — deyiladi xabarda.
Shunday qilib, Rossiya xalqaro aeroportlariga charter reyslari bilan kelgan O‘zbekiston fuqarolari chegarani kesib o‘tishda va tasdiqlovchi hujjatlar yuzasidan muammolarga duch kelishi mumkin.
Yuqoridagilarni inobatga olgan holda, O‘zbekiston TIV shubhali shaxslarning ta‘siriga tushib qolmaslik va aldanib qolmaslik, Rossiya hududiga kirishda rad javobi olmaslik uchun hamda charter reyslari tashkilotchilari va aviatashuvchilar bilan sud jarayonlarining oldini olish maqsadida, oliy o‘quv yurtlari xalqaro bo‘limlari bilan doimiy ravishda aloqada bo‘lib turish va chegaralar ochilgunga qadar masofaviy ta‘limni davom ettirishni so‘raydi.
Avvalroq o‘zbekistonlik talabalar uchun Rossiya OTMlaridagi kvotalar soni ko‘paytirilishi to‘g‘risida xabar berilgandi.
Izoh (0)