5 февраль куни Президент Шавкат Мирзиёев кутилмаганда Фарғона шаҳридаги «Шодиёна» маҳалласига бориб, маҳалла оралаб юргани ва аҳоли билан учрашгани тўғрисида хабар берилганди. Президент матбуот хизмати томонидан тақдим этилган «Махсус ракурс» кўрсатувининг навбатдаги сонида давлат раҳбари маҳалла идораси биноси билан танишиш истагини билдиргани, кўп қаватли турар жой биноларининг аҳолиси билан суҳбатлашганини кўриш мумкин.
Маҳалла йўлларининг носозлиги сабабли давлат раҳбари Автомобиль йўллари давлат қўмитаси раиси Абдураҳмон Абдувалиевга танбеҳ берган.
«Мана шу йўлларга ким жавоб бериши керак? [қўмита раиси ушбу саволга «Ўзи битта одам, биз жавоб берамиз» дея жавоб қайтарган] Шунча ёнимда юрган одамсан, нега шуни менга айтмайсан. Шармандалик эмасми бу?! Йўллар сифатини қара… Ичкарини қара… Майли, туманларда ҳеч бало қилмаяпсан, шаҳардачи? Мен айтмасам нега қилмайсан шуни? Тўрт йилдан буён ёнимда юрибсан-ку…
Абдураҳмон Абдувалиев айб ўзларида эканлигини тан олган. Президент эса нима учун ҳалигача ўзгариш бўлмаганини, бу маҳалладан кетиши билан яна «эски ҳаммом, эски тос» бўлишини таъкидлаб ўтган.
Аввалроқ Президент Шавкат Мирзиёевнинг Фарғона вилоятига ташрифи давомида Қува, Ёзёвон ва Ўзбекистон туманлари ҳокимлари, шунингдек, Фарғона шаҳри «тўртлиги» вазифасидан озод қилингани ҳақида хабар берилган эди.
Изоҳ (0)