Avstraliyalik olimlar tibbiyot niqoblarini maydalash hamda binolarni buzishda hosil bo‘lgan betonlarni qayta ishlash orqali yo‘l qurilishida foydalansa bo‘ladigan yangi materialni yaratdi, deb xabar beradi “Korrespondent.net”.
“Ikki polosali bir kilometrlik yo‘l qurish uchun 3 million dona niqob kerak bo‘ladi. Bu 93 tonna chiqindining tashlab yuborilishining oldini olishga xizmat qiladi”, — deyiladi loyiha izohida.
Yo‘l qurishda foydalanish mumkin bo‘lgan yangi material Melburn Qirollik texnologiya instituti tadqiqotchilari tomonidan yaratilgan. Ushbu material tarkibi — maydalangan bir martalik niqoblar va qayta ishlangan qurilish chiqindilari.
“Gap shundaki, bir martalik niqoblar tarkibida plastik mavjud, jumladan, qiyin parchalanadigan polipropilen. Niqoblardagi polipropilen tolalari shag‘allar orasidagi zarralarning o‘zaro bog‘lanishini kuchaytirib, yo‘lning mustahkamligiga xizmat qiladi”, — deydi tajriba rahbari professor Ji Li.
Tadqiqotchilarning ta’kidlashicha, mazkur qorishma qurilishga ketadigan sarf-xarajatlarni 30 foizga qisqartirishga yordam beradi. Karyerdan beton qazib olish uchun tonnasiga salkam 50 dollar sarflanadi, qayta ishlangan beton esa 26 dollar atrofida. Niqoblarni yig‘ish va dezinfeksiya qilishga ketadigan xarajatlar tonnasi uchun 32 dollardan 78 dollargacha bo‘ladi.
Izoh (0)