Koronavirusning Janubiy Afrikada paydo bo‘lgan shtammi antitanalarga ancha bardoshli bo‘lib chiqdi. Bu haqda koronavirusga qarshi ikkita vaksinaning klinik sinovlariga oid ma’lumotlarga tayanib, “Korrespondent.net” xabar berdi.
Yangi ma’lumot shuni anglatadiki, vaksina bilan emlangan inson Janubiy Afrika shtammiga chalingan odam bilan muloqotda undan to‘liq himoyalanmagan.
Novavax va Johnson & Johnson vaksinalari mutatsiyaga uchragan koronavirus tarqalgan Janubiy Afrikadagi sinov ishtirokchilarida sezilarli darajada kam samaradorlik ko‘rsatgan. Original virusga qarshi samaradorligi 89,3 foiz bo‘lgan Novavax Janubiy Afrikadagi insonlarda 50 foizli ko‘rsatkichni namoyon etgan.
Johnson & Johnson kompaniyasining ma’lum qilishicha, koronavirusga qarshi bir marta emlanish uchta mintaqada umumiy hisobda 66 foiz samaradorlikni ko‘rsatgan, biroq mintaqalar orasida katta farq bor.
AQShda Johnson & Johnson dori vositasining samaradorligi 72 foizga yetgan, Janubiy Afrikada — 57 foiz.
Pfizer bosh direktori Albert Burlaning ta’kidlashicha, koronavirusning yangi variantlari “katta ehtimol bilan” vaqt o‘tishi bilan kompaniyaning vaksinasini samarasizga aylantirishi mumkin.
Shu bilan birga, olimlarning qayd etishicha, virusning kelajakdagi evolyutsiyasini to‘xtatishning eng yaxshi yo‘li — uning ko‘payishini to‘xtatish. Bu odamlarni tezroq vaksinatsiyadan o‘tkazish kerakligini bildiradi.
Avvalroq Janubiy Afrika olimlari koronavirusning yangi shtammi yuqori darajada yuqumliligini isbotlagani, Daniyada ham koronavirusning “afrikacha” shtammi aniqlangani haqida xabar berilgandi.
Mavzuga doir: AQShda koronavirusning “afrikacha” shtammi aniqlandi
Izoh (0)