Artel kompaniyasi Khan Academy Uzbek onlayn ta’lim platformasiga 4 mlrd so‘mdan kam bo‘lmagan homiylik mablag‘i ajratadi

Joriy yilning 1-fevral kuni Hilton mehmonxonasida Artel kompaniyalar guruhi va Khan Academy Uzbek bepul onlayn ta’lim platformasi o‘rtasida homiylik to‘g‘risida memorandum imzolandi. Mazkur homiylik shartnomasiga ko‘ra, Artel kompaniyalar guruhi platformani rivojlantirishga 4 milliard so‘mdan kam bo‘lmagan miqdorda mablag‘ ajratadigan bo‘ldi.

Endilikda Artel homiyligida Khan Academy Uzbek ta’lim platformasini rivojlantirishning navbatdagi bosqichi start olishi kutilmoqda.

Xususan, ikkinchi bosqichda:

• veb-platformaning asosiy funksiyalarini aniqlash va rivojlantirish;
• kontentni milliy o‘rta va oliy ta’lim o‘quv darsliklariga moslashtirish;
• mustaqil o‘rganish uchun metodik qo‘llanma va o‘quv darslarini tayyorlash;
• o‘rta va oliy ta’lim o‘qituvchilari uchun platformaning ta’lim resurslaridan o‘zbek tilidagi qo‘shimcha va ko‘makchi o‘quv kontenti sifatida foydalanishni rag‘batlantirish;
• milliy oliy ta’lim muassasalarining kirish imtihonlariga tayyorgarlik ko‘rish uchun platforma o‘quv resurslaridan foydalanish metodikasini yaratish;
• xorijiy oliy ta’lim muassasalarining kirish imtihonlariga tayyorgarlik ko‘rish uchun platforma o‘quv resurslaridan foydalanish metodikasini yaratish;
• boshqa o‘quv kontentini topish va mahalliylashtirish bo‘yicha ishlarni tashkil etish kabi vazifalarni amalga oshirish rejalashtirilmoqda.

Ma’lumot uchun, Khan Academy Uzbek o‘zida matematika, fizika, kimyo, biologiya, iqtisodiyot, ingliz tili, tibbiyot, astronomiya, moliya, tarix kabi fanlar bo‘yicha mavzulashtirilgan interaktiv mashqlarni jamlagan yirik platforma. Undan foydalanish mutlaqo bepul bo‘lgani sababli o‘zbekistonlik yoshlar orasida ancha mashhur.

O‘tgan yili dekabrda loyiha asoschisi Botir Orifjonov uni yanada rivojlantirish uchun ijtimoiy tarmoqlarda homiylik masalasida yordam so‘rab, murojaat bilan chiqqan edi.

Artel kompaniyasi ushbu loyihani qo‘llab-quvvatlashga tayyor ekanini bildirib, loyihaning ikkinchi bosqichida bosh homiy bo‘lish istagini bildirdi. Bu faqat boshlanishi bo‘lib, Artel kelgusida ham shu kabi loyihalarni amalga oshirishni va qo‘llab-quvvatlashni maqsad qilgan.

Reklama huquqi asosida.