Жорий йилнинг 1 февраль куни Hilton меҳмонхонасида Artel компаниялар гуруҳи ва Khan Academy Uzbek бепул онлайн таълим платформаси ўртасида ҳомийлик тўғрисида меморандум имзоланди. Мазкур ҳомийлик шартномасига кўра, Artel компаниялар гуруҳи платформани ривожлантиришга 4 миллиард сўмдан кам бўлмаган миқдорда маблағ ажратадиган бўлди.
Эндиликда Artel ҳомийлигида Khan Academy Uzbek таълим платформасини ривожлантиришнинг навбатдаги босқичи старт олиши кутилмоқда.
Хусусан, иккинчи босқичда:
- веб-платформанинг асосий функцияларини аниқлаш ва ривожлантириш;
- контентни миллий ўрта ва олий таълим ўқув дарсликларига мослаштириш;
- мустақил ўрганиш учун методик қўлланма ва ўқув дарсларини тайёрлаш;
- ўрта ва олий таълим ўқитувчилари учун платформанинг таълим ресурсларидан ўзбек тилидаги қўшимча ва кўмакчи ўқув контенти сифатида фойдаланишни рағбатлантириш;
- миллий олий таълим муассасаларининг кириш имтиҳонларига тайёргарлик кўриш учун платформа ўқув ресурсларидан фойдаланиш методикасини яратиш;
- хорижий олий таълим муассасаларининг кириш имтиҳонларига тайёргарлик кўриш учун платформа ўқув ресурсларидан фойдаланиш методикасини яратиш;
- бошқа ўқув контентини топиш ва маҳаллийлаштириш бўйича ишларни ташкил этиш каби вазифаларни амалга ошириш режалаштирилмоқда.
Маълумот учун, Khan Academy Uzbek ўзида математика, физика, кимё, биология, иқтисодиёт, инглиз тили, тиббиёт, астрономия, молия, тарих каби фанлар бўйича мавзулаштирилган интерактив машқларни жамлаган йирик платформа. Ундан фойдаланиш мутлақо бепул бўлгани сабабли ўзбекистонлик ёшлар орасида анча машҳур.
Ўтган йили декабрда лойиҳа асосчиси Ботир Орифжонов уни янада ривожлантириш учун ижтимоий тармоқларда ҳомийлик масаласида ёрдам сўраб, мурожаат билан чиққан эди.
Artel компанияси ушбу лойиҳани қўллаб-қувватлашга тайёр эканини билдириб, лойиҳанинг иккинчи босқичида бош ҳомий бўлиш истагини билдирди. Бу фақат бошланиши бўлиб, Artel келгусида ҳам шу каби лойиҳаларни амалга оширишни ва қўллаб-қувватлашни мақсад қилган.
Реклама ҳуқуқи асосида.
Изоҳ (0)