Pokistonning Panjob viloyati gubernatori Muhammad Sarvar boshchiligidagi delegatsiya bortida bo‘lgan samolyot Namangan xalqaro aeroportiga qo‘ndi. Bu haqda “Daryo” muxbiri Azizbek Abduvaliyev xabar bermoqda.
Havo kemasi Panjobdan to‘g‘ridan to‘g‘ri Namanganga parvoz qilgani aytilmoqda. Aeroportda martabali mehmonni viloyat hokimining birinchi o‘rinbosari Tolibjon Yusupov kutib oldi.
Delegatsiya mehmonxonaga joylashganidan so‘ng Namangan shahridagi “Afsonalar vodiysi” bog‘i bilan tanishtirildi.
Tashrif dasturining asosiy qismi 6-fevral kunidan boshlanadi: Namangan viloyati hokimi Shavkatjon Abdurazzoqov va Panjob viloyati gubernatori Muhammad Sarvar o‘rtasida muzokaralar o‘tkazilishi, muzokara yakunida “Birodar hududlar” kelishuvining imzolanishi kutilmoqda.
Pokiston delegatsiyasi uch kun davomida Namanganda bo‘ladi, shundan so‘ng Samarqand hamda Buxoroga yo‘l oladi.
Izoh (0)