Yaqin ikki yil ichida O‘zbekistonda raqamli infratuzilmani rivojlantirish uchun 2,5 milliard dollar jalb etiladi. Bu haqda bosh vazir Abdulla Aripov 5-fevral kuni Olmaotada bo‘lib o‘tgan forumdagi chiqishida ma’lum qildi, deb xabar bermoqda “Gazeta.uz”
Uning so‘zlariga ko‘ra, ushbu mablag‘lar hisobiga Toshkentda, Buxoroda va Qo‘qonda uchta yangi data-markazlar ishga tushirilishi, telekommunikatsiyalarning fiksatsiya qilingan tarmoqlarini kengaytirish va mobil aloqalarni modernizatsiya qilish, elektron hukumatni rivojlantirish va IT sohasida kadrlarni tayyorlash ishlari amalga oshirilishi ko‘zda tutilgan.
Hukumat rahbari o‘z chiqishida barcha bolalar bog‘chalarida, tibbiyot muassasalarida va 8000 dan ortiq maktablarda yuqori tezlikdagi internet ta’minlanganini ma’lum qildi. “Bu yil biz qolgan maktablarni ulashni yakunlash, shuningdek, barcha — butun mamlakat bo‘yicha 10 mingga yaqin mahalla fuqarolar yig‘inlarini internet bilan ta’minlashni rejalashtiryapmiz”, — deya qo‘shimcha qilgan u.
Abdulla Aripov joriy yilda sog‘liqni saqlash va qishloq xo‘jaligi sohalarida ham raqamlashtirishni kengaytirish hamda bank sohasidagi transformatsiyani davom ettirish rejalashtirilganini ta’kidladi.
Raqamli tadbirkorlikni rivojlantirish ham ustuvor vazifalar qatorida, deya davom ettirgan bosh vazir. U mamlakatda raqamli xizmatlarga talab sezilarli darajada oshganini, elektron to‘lov tizimlari foydalanuvchilari soni esa 14 million kishidan oshganini qayd etdi.
Raqamli forumda Yevrosiyo iqtisodiy ittifoqi a’zo va kuzatuvchi mamlakatlari hukumati rahbarlari qatnashgan. Shu kuni Olmaotada O‘zbekiston delegatsiyasi ilk bor ishtirok etayotgan Yevrosiyo hukumatlararo kengashining yig‘ilishi ham bo‘lib o‘tadi.
Forum oldidan Abdulla Aripov Rossiya bosh vaziri Mixail Mishustin, Qirg‘iziston bosh vaziri Ulug‘bek Maripov bilan uchrashdi.
Izoh (0)