O‘zbekiston Oliy Majlisi Senati 5-fevral kuni bo‘lib o‘tgan 12-yalpi majlisida saylov qonunchiligi takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risidagi qonunni ma’qulladi. Bu haqda “Gazeta.uz” xabar qildi.
Qonunchilik palatasi tomonidan 29-yanvar kuni qabul qilingan qonunni ko‘rib chiqqan Senatning Korrupsiyaga qarshi kurashish va sud-huquqiy masalalar qo‘mitasi raisi Narimon Umarov qonun bo‘yicha xulosa qildi.
Uning so‘zlariga ko‘ra, qonunda 2019-yilgi parlament saylovlarini tashkil etish va o‘tkazishdagi kamchiliklar hamda Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi tavsiyalari hisobga olingan.
Qonundagi bandlardan biri bilan Prezident, Qonunchilik palatasi, Qoraqalpog‘iston Jo‘qorg‘i Kengesi, shuningdek, viloyatlar, tumanlar va shaharlar davlat hokimiyati vakillik organlari uchun o‘tkaziladigan saylovlar sanasi dekabr oyining uchinchi o‘n kunligining birinchi yakshanbasidan oktabr oyining uchinchi o‘n kunligining birinchi yakshanbasiga ko‘chirildi (2021-yilda ushbu sana 24-oktabrga to‘g‘ri kelmoqda).
Bundan tashqari, Saylov kodeksi va “Siyosiy partiyalarni moliyalashtirish to‘g‘risida”gi qonunga o‘zgartirishlar kiritilmoqda.
Qonun kuchga kirishi uchun uni Prezident imzolashi kerak.
Izoh (0)