Buxoro shahridagi 39-sonli ixtisoslashtirilgan davlat umumta’lim maktabining 40 nafardan ortiq o‘qituvchi, murabbiylari hamda ota-onalari nomidan kelib tushgan murojaat yuzasidan “Daryo” muxbiri surishtiruv o‘tkazdi.
Ma’lum bo‘lishicha, Buxoro shahridagi Islom Karimov ko‘chasida joylashgan maktab ikki tomonidan qurilish tashkilotlarining qurilish maydoniga aylanib ulgurgan. Bundan esa aholi norozi bo‘lmoqda.
“ ‘Aziya Olot qurilish’ MChJ tomonidan qurilish olib borish maqsadida qazilgan katlovanni bittagina maktab sinfxonalari devori ajratib turibdi. O‘quv binolari 1963-yilda barpo etilgan bo‘lib, ayni kunga kelib qurilish jarayonlari natijasida devorlar ag‘anab ketishi yoxud o‘quvchi-yoshlarga talafot yetkazishi ehtimoli yo‘q emas. Bu masalada Buxoro shahar hokimi-yu viloyat hokimligi mutasaddilariga juda ko‘p bor murojaat qildik. Ammo foydasi bo‘lmadi”, — dedi 39-IDUM direktorining o‘quv ishlari bo‘yicha o‘rinbosari Nodir Nurov.
Aniqlanishicha, “Aziya Olot qurilish” MChJ mas’ullari 2020-yil 10-iyul kuni hech kimni ogohlantirmasdan, ekskavator yordamida maktab hududini va u yerda joylashgan qozonxona binosi devorini buzib tashlagan. Buzilish ishlari bajarilayotgan paytda 1070 nafar o‘quvchi xavfsizligi ta’minlanmagan. Buxoro viloyati hokimi o‘rinbosari Narzulla Hamdamov hamda Buxoro shahar hokimi O‘tkir Jumayevlar bilan ushbu masala yuzasidan muloqot qilish uchun bir necha kun davomida qo‘ng‘iroq qildik, biroq bog‘lanish imkoni bo‘lmadi.
“Aziya Olot qurilish” MChJ rahbari Shavkat Hamroqulovning bildirishicha u qonunbuzilishga yo‘l qo‘ymagan. Loyiha smetada belgilangan qizil chiziqdan chiqmagan. Faqat maktab devorining eskiligi unga tutash binoning qulagani bois abgor ko‘rinish kasb etgan. Quruvchi tashkilot rahbari, shuningdek, muammoni bartaraf etib, maktab devorini soz holga keltirib, to‘siqlarni tiklagach qurilishini davom ettirishini, ayni paytda esa qurilish ishlari to‘xtatilganini ma’lum qildi.
“Shahar markazida rekonstruksiya ishlari bajarilib, ko‘p qavatli yangi uy-joylar qurilishi yaxshi, albatta. Biroq bunday ishlarni amalga oshirishda aholiga, xususan, ta’lim muassasasi manfaatlariga zarar yetkazmaslik kerak. Big city life MChJ rahbari hamda 39-sonli ixtisoslashtirilgan davlat umumta’lim maktabi direktori o‘rtasida 2020-yilning 30-noyabrida faqatgina vaqtinchalik mashina mexanizmi qurilishi jarayonida maktabning tutash chegarasiga kirib-chiqishga ruxsat uchun dalolatnoma tuzilgan. Qurilish tashkiloti esa dalolatnomaga zid ravishda maktab stadionining 530,0 metr kvadrat maydonini egallab olib, noqonuniy ravishda profnastillar bilan o‘rab olgan va maktab chegarasidan ichkarida qazish ishlarini olib borgan. Har ikki tomondan o‘quvchilarimizning xavfsizligi ta’minlanmagani ham bizni — maktab jamoasi va ota-onalarni tashvishlantirmoqda”, — deydi Nodir Nurov.
“Daryo” muxbiri tomonidan olib borilgan surishtiruv jarayonida maktab atrofida uning hududiga zarar yetkazmagan holda rekonstruksiya va qurilish ishlarini olib borish aslida Buxoro shahar qurilish bo‘limi tomonidan Big city life MChJga emas, balki 2020-yil 9-noyabrdagi №104-sonli hujjat bilan “Industriya plyus servis” MChJga faqat belgilangan maydondagina ishlashga ruxsat berilgan. Shuningdek, Buxoro shahar arxitektura qurilish bo‘limining 2021-yil 18-yanvardagi xatiga asosan Big city life MChJga o‘zboshimchalik bilan olib borilgan qurilish ishlarini bartaraf qilish uchun ogohlantirishlar ham berilgan. Har ikkala quruvchi tashkilotning ham harakatlari noqonuniy ekanligi aniqlanib, yetkazilgan zararni o‘z hisobidan bartaraf etish uchun ikki kunlik muhlat berilgan. Ushbu muhlat allaqachon o‘tganiga qaramay, hanuzgacha ushbu yetkazilgan zararlar bartaraf qilinmagan.
Big city life qurilish tashkiloti rahbari, yosh tadbirkor jurnalistik surishtiruv jarayonida “Daryo” muxbirini iznsiz ovozini yozib olayotganlikda ayblab, po‘pisa ham qilgan.
“Buxoro shaharsozlik loyihasiga ko‘ra, biz qurilishni boshlamoqchi bo‘lib turgan obyekt yonidan ‘Buxoro’ markaziy stadion yo‘nalishida yo‘l o‘tishi belgilangan. Shunga ko‘ra, qurilish ishlari davomida shu yo‘l mustahkamligini ta’minlash uchun uning ostini shag‘al bilan to‘ldirish kerak edi. Ayni paytda esa biz tomondan qazilgan katlovandan zax suvi chiqdi. Bir necha marta nasos orqali zax suvni chiqardik. Baribir, haligacha chuqurlik qurimagan. Ogohlantirish xatida belgilangan muddatda muammoni bartaraf etib bo‘lmayotgani ayni shu masalaga bog‘liq. Noqonuniy harakatim uchun menga viloyat qurilish bosh boshqarmasi tomonidan jarima qo‘llanildi. Jarimani ham to‘laymiz”, — dedi qurilish tashkiloti mas’uli Miraziz Tohirov.
Ma’lum bo‘lishicha, 39-IDUM 1963-yil temir betondan 220 o‘rinli maktabgacha ta’lim muassasasiga mo‘ljallab qurilgan bo‘lib, 2007-yildan boshlab 620 o‘rinli maktab-gimnaziyaga aylantirilgan. 2009-yilda ixtisoslashtirilgan ijtimoiy va aniq fanlar maktabiga o‘zgartirilgan. 620 o‘ringa moslashtirilgan ta’lim muassasasida 1070 nafar o‘quvchi tahsil olmoqda. Maktab ta’mirga muhtoj. Sportzal yo‘q, o‘quv xonalari yetishmaydi.
Big city life qurilish tashkiloti rahbari “Daryo” muxbiriga shunday ahvoldagi maktabni 4-5 qavatli, zamonaviy ko‘rinishda ham qurib berishga tayyorligini bildirdi. Buxoro viloyati hokimligi qurilish bo‘limi vakili Abbos G‘aybullayev esa mazkur qurilish tashkiloti tomonidan Buxoroda birorta qurilish obyekti yoki ko‘zga ko‘rinarli inshoot barpo etilmaganini bildirdi.
“Daryo” manbasiga ko‘ra, “Aziya Olot qurilish” hamda Big city life MChJlar qurilish qilish uchun na maktab ma’muriyati, na xalq ta’limi boshqarmasi va na vazirlik ruxsatini olgan. Eng qizig‘i, har ikki qurilish tashkiloti Buxoro shahri markazida texniklar va ekskavatorlar yordamida katlovanlar qazib, temir sim va armaturalar yotqizishadi-yu, mutasaddilar bundan xabar topmaydi. Buxoro shahri hokimi esa go‘yo holat qanday yakunlanishini jimgina chetdan kuzatib turgandek.
O‘zboshimcha qurilish OAV aralashuvi bilan vaqtincha to‘xtatilgan. Biroq davom etish ehtimoli yo‘q emas.
Izoh (0)