Бухоро шаҳридаги 39-сонли ихтисослаштирилган давлат умумтаълим мактабининг 40 нафардан ортиқ ўқитувчи, мураббийлари ҳамда ота-оналари номидан келиб тушган мурожаат юзасидан «Дарё» мухбири суриштирув ўтказди.
Маълум бўлишича, Бухоро шаҳридаги Ислом Каримов кўчасида жойлашган мактаб икки томонидан қурилиш ташкилотларининг қурилиш майдонига айланиб улгурган. Бундан эса аҳоли норози бўлмоқда.
« ‘Азия Олот қурилиш’ МЧЖ томонидан қурилиш олиб бориш мақсадида қазилган катлованни биттагина мактаб синфхоналари девори ажратиб турибди. Ўқув бинолари 1963 йилда барпо этилган бўлиб, айни кунга келиб қурилиш жараёнлари натижасида деворлар ағанаб кетиши ёхуд ўқувчи-ёшларга талафот етказиши эҳтимоли йўқ эмас. Бу масалада Бухоро шаҳар ҳокими-ю вилоят ҳокимлиги мутасаддиларига жуда кўп бор мурожаат қилдик. Аммо фойдаси бўлмади», — деди 39-ИДУМ директорининг ўқув ишлари бўйича ўринбосари Нодир Нуров.
Аниқланишича, «Азия Олот қурилиш» МЧЖ масъуллари 2020 йил 10 июль куни ҳеч кимни огоҳлантирмасдан, экскаватор ёрдамида мактаб ҳудудини ва у ерда жойлашган қозонхона биноси деворини бузиб ташлаган. Бузилиш ишлари бажарилаётган пайтда 1070 нафар ўқувчи хавфсизлиги таъминланмаган. Бухоро вилояти ҳокими ўринбосари Нарзулла Ҳамдамов ҳамда Бухоро шаҳар ҳокими Ўткир Жумаевлар билан ушбу масала юзасидан мулоқот қилиш учун бир неча кун давомида қўнғироқ қилдик, бироқ боғланиш имкони бўлмади.
«Азия Олот қурилиш» МЧЖ раҳбари Шавкат Ҳамроқуловнинг билдиришича у қонунбузилишга йўл қўймаган. Лойиҳа сметада белгиланган қизил чизиқдан чиқмаган. Фақат мактаб деворининг эскилиги унга туташ бинонинг қулагани боис абгор кўриниш касб этган. Қурувчи ташкилот раҳбари, шунингдек, муаммони бартараф этиб, мактаб деворини соз ҳолга келтириб, тўсиқларни тиклагач қурилишини давом эттиришини, айни пайтда эса қурилиш ишлари тўхтатилганини маълум қилди.
«Шаҳар марказида реконструкция ишлари бажарилиб, кўп қаватли янги уй-жойлар қурилиши яхши, албатта. Бироқ бундай ишларни амалга оширишда аҳолига, хусусан, таълим муассасаси манфаатларига зарар етказмаслик керак. Big city life МЧЖ раҳбари ҳамда 39-сонли ихтисослаштирилган давлат умумтаълим мактаби директори ўртасида 2020 йилнинг 30 ноябрида фақатгина вақтинчалик машина механизми қурилиши жараёнида мактабнинг туташ чегарасига кириб-чиқишга рухсат учун далолатнома тузилган. Қурилиш ташкилоти эса далолатномага зид равишда мактаб стадионининг 530,0 метр квадрат майдонини эгаллаб олиб, ноқонуний равишда профнастиллар билан ўраб олган ва мактаб чегарасидан ичкарида қазиш ишларини олиб борган. Ҳар икки томондан ўқувчиларимизнинг хавфсизлиги таъминланмагани ҳам бизни — мактаб жамоаси ва ота-оналарни ташвишлантирмоқда», — дейди Нодир Нуров.
«Дарё» мухбири томонидан олиб борилган суриштирув жараёнида мактаб атрофида унинг ҳудудига зарар етказмаган ҳолда реконструкция ва қурилиш ишларини олиб бориш аслида Бухоро шаҳар қурилиш бўлими томонидан Big city life МЧЖга эмас, балки 2020 йил 9 ноябрдаги №104-сонли ҳужжат билан «Индустрия плюс сервис» МЧЖга фақат белгиланган майдондагина ишлашга рухсат берилган. Шунингдек, Бухоро шаҳар архитектура қурилиш бўлимининг 2021 йил 18 январдаги хатига асосан Big city life МЧЖга ўзбошимчалик билан олиб борилган қурилиш ишларини бартараф қилиш учун огоҳлантиришлар ҳам берилган. Ҳар иккала қурувчи ташкилотнинг ҳам ҳаракатлари ноқонуний эканлиги аниқланиб, етказилган зарарни ўз ҳисобидан бартараф этиш учун икки кунлик муҳлат берилган. Ушбу муҳлат аллақачон ўтганига қарамай, ҳанузгача ушбу етказилган зарарлар бартараф қилинмаган.
Big city life қурилиш ташкилоти раҳбари, ёш тадбиркор журналистик суриштирув жараёнида «Дарё» мухбирини изнсиз овозини ёзиб олаётганликда айблаб, пўписа ҳам қилган.
«Бухоро шаҳарсозлик лойиҳасига кўра, биз қурилишни бошламоқчи бўлиб турган объект ёнидан ‘Бухоро’ марказий стадион йўналишида йўл ўтиши белгиланган. Шунга кўра, қурилиш ишлари давомида шу йўл мустаҳкамлигини таъминлаш учун унинг остини шағал билан тўлдириш керак эди. Айни пайтда эса биз томондан қазилган катловандан зах суви чиқди. Бир неча марта насос орқали зах сувни чиқардик. Барибир, ҳалигача чуқурлик қуримаган. Огоҳлантириш хатида белгиланган муддатда муаммони бартараф этиб бўлмаётгани айни шу масалага боғлиқ. Ноқонуний ҳаракатим учун менга вилоят қурилиш бош бошқармаси томонидан жарима қўлланилди. Жаримани ҳам тўлаймиз», — деди қурилиш ташкилоти масъули Миразиз Тоҳиров.
Маълум бўлишича, 39-ИДУМ 1963 йил темир бетондан 220 ўринли мактабгача таълим муассасасига мўлжаллаб қурилган бўлиб, 2007 йилдан бошлаб 620 ўринли мактаб-гимназияга айлантирилган. 2009 йилда ихтисослаштирилган ижтимоий ва аниқ фанлар мактабига ўзгартирилган. 620 ўринга мослаштирилган таълим муассасасида 1070 нафар ўқувчи таҳсил олмоқда. Мактаб таъмирга муҳтож. Спортзал йўқ, ўқув хоналари етишмайди.
Big city life қурилиш ташкилоти раҳбари «Дарё» мухбирига шундай аҳволдаги мактабни 4-5 қаватли, замонавий кўринишда ҳам қуриб беришга тайёрлигини билдирди. Бухоро вилояти ҳокимлиги қурилиш бўлими вакили Аббос Ғайбуллаев эса мазкур қурилиш ташкилоти томонидан Бухорода бирорта қурилиш объекти ёки кўзга кўринарли иншоот барпо этилмаганини билдирди.
«Дарё» манбасига кўра, «Азия Олот қурилиш» ҳамда Big city life МЧЖлар қурилиш қилиш учун на мактаб маъмурияти, на халқ таълими бошқармаси ва на вазирлик рухсатини олган. Энг қизиғи, ҳар икки қурилиш ташкилоти Бухоро шаҳри марказида техниклар ва экскаваторлар ёрдамида катлованлар қазиб, темир сим ва арматуралар ётқизишади-ю, мутасаддилар бундан хабар топмайди. Бухоро шаҳри ҳокими эса гўё ҳолат қандай якунланишини жимгина четдан кузатиб тургандек.
Ўзбошимча қурилиш ОАВ аралашуви билан вақтинча тўхтатилган. Бироқ давом этиш эҳтимоли йўқ эмас.
Изоҳ (0)