Business Insider nashrining aniqlashicha, Porsche kompaniyasidagi Cayenne loyihasi yetakchisi, muhandis Manfred Xarrer 2020-yil oxirida Apple jamoasiga kelib qo‘shilgan. Volkswagen Group’ning eng yaxshi xodimlaridan biri hamkasblariga endilikda nima bilan shug‘ullanishini ma’lum qilmay, nemis konsernini tark etgan, deb xabar beradi Motor. Jurnalistlarning taxminicha, gap Apple’ning birinchi elektrokarini yaratish haqida ketmoqda.
Xarrer Volkswagen Group’da 13 yil ishlagan va uning so‘nggi loyihalaridan biri Porsche Cayenne uchun shassi yaratish bo‘lgan. Apple’ning muhandisga qiziqish bildirgani, kompaniya o‘zining kamida 2027-yilda taqdim etiladigan iCar — IT-gigantning birinchi elektrokari loyihasi ustidagi ishlarni davom ettirishidan dalolat berishi mumkin.
Apple bunga qadar ham avtomobil sohasida faoliyat ko‘rsatgan ishchilarni yollagan. Masalan, 2019-yilda Tesla’ning injiniring bo‘yicha sobiq vitse-prezidenti Stiv MakManus kompaniyaga o‘tgan edi. U bunga qadar Aston Martin Lagonda, Jaguar Land Rover va Bentley brendlarining avtomobillari ustida ham ish olib borgan.
Eslatib o‘tamiz, Apple avtopilotni sinovdan o‘tkazish bo‘yicha ruxsatnomani 2017-yilda qo‘lga kiritgan. Kompaniya o‘z avtomobilini yaratishga tayyorlanayotgani to‘g‘risidagi mish-mishlar kamida 5 yil oldin tarqalishni boshlagan. Xususan, 2015-yili Apple 2019-yilgacha o‘z elektromobilini taqdim etishi to‘g‘risida xabar berilgandi.
Izoh (0)