Qashqadaryo viloyatida Damas haydovchisiga kuch ishlatgan transport boshqarmasi xodimi ishdan olindi. Bu haqda Transport boshqarmasi axborot xizmati ma’lum qildi.
Xabar berilishicha, ijtimoiy tarmoqlarda transport boshqarmasi xodimi va haydovchi muloqoti aks etgan video tarqalgan. Mazkur videoda transport boshqarmasi xodimining haydovchiga qo‘pol munosabatda bo‘lib, uning boshini qo‘li bilan egib, kuch ishlatganini ko‘rish mumkin.
Videodan anglashilishicha, YPX xodimi bilan birgalikda o‘z xizmat vazifasini bajarayotgan transport boshqarmasi xodimi Laziz ismli Damas haydovchisini to‘xtatib, olib ketayotgan yo‘lovchilarining kimligi bilan qiziqqan. Hamda haydovchining litsenziyasiz odam tashiyotganini taxmin qilgan.
Videodan, shuningdek, haydovchining “bular qarindoshlarim”, degan ovozi eshitiladi. Notanish ovoz sohibi esa haydovchiga “Agar shular qarindoshlaringiz bo‘lmasa, Xudo ursinmi, Hazrati Dovud pir ursinmi?”, deya qasam ichishga majburlaydi.
“Voqea 2021-yil 30-yanvar kuni Yakkabog‘ tumanida sodir bo‘lgan. Holat yuzasidan boshqarma tomonidan o‘rganish tashkil etildi. Videolavhada aks etgan vaziyat o‘z xizmat vakolatlaridan chetga chiqish, deya baholandi. Xizmat vaqtida nojo‘ya xatti-harakatni amalga oshirgani uchun xodim B.M.ga keskin chora ko‘rildi, u boshqarma boshlig‘ining buyrug‘i bilan egallab turgan vazifasidan ozod etildi”, — deyiladi boshqarma axborot xizmati ma’lumotida.
Boshqarma axborot xizmatining qayd etishicha, boshqarma rahbariyati tomonidan xodimlarga xizmat yo‘riqnomasiga qat’iy rioya qilishi lozimligi muntazam tushuntirib boriladi.
Mavzuga doir:
- Qashqadaryoda Damas haydovchilari odam tashishga ruxsat berilmagani sabab 150 nafar kishi ishsiz qolganini aytdi. Transport boshqarmasi mas’uli bunga izoh berdi
- Haydovchi kirakashlik qilganini tan oldi, transport boshqarmasi xodimi esa haydovchidan uzr so‘radi. Internetda tarqalgan video tafsilotlari ma’lum bo‘ldi
Izoh (0)