Business Insider нашрининг аниқлашича, Porsche компаниясидаги Cayenne лойиҳаси етакчиси, муҳандис Манфред Харрер 2020 йил охирида Apple жамоасига келиб қўшилган. Volkswagen Group’нинг энг яхши ходимларидан бири ҳамкасбларига эндиликда нима билан шуғулланишини маълум қилмай, немис концернини тарк этган, деб хабар беради Motor. Журналистларнинг тахминича, гап Apple’нинг биринчи электрокарини яратиш ҳақида кетмоқда.
Харрер Volkswagen Group’да 13 йил ишлаган ва унинг сўнгги лойиҳаларидан бири Porsche Cayenne учун шасси яратиш бўлган. Apple’нинг муҳандисга қизиқиш билдиргани, компания ўзининг камида 2027 йилда тақдим этиладиган iCar — IT-гигантнинг биринчи электрокари лойиҳаси устидаги ишларни давом эттиришидан далолат бериши мумкин.
Apple бунга қадар ҳам автомобиль соҳасида фаолият кўрсатган ишчиларни ёллаган. Масалан, 2019 йилда Tesla’нинг инжиниринг бўйича собиқ вице-президенти Стив МакМанус компанияга ўтган эди. У бунга қадар Aston Martin Lagonda, Jaguar Land Rover ва Bentley брендларининг автомобиллари устида ҳам иш олиб борган.
Эслатиб ўтамиз, Apple автопилотни синовдан ўтказиш бўйича рухсатномани 2017 йилда қўлга киритган. Компания ўз автомобилини яратишга тайёрланаётгани тўғрисидаги миш-мишлар камида 5 йил олдин тарқалишни бошлаган. Хусусан, 2015 йили Apple 2019 йилгача ўз электромобилини тақдим этиши тўғрисида хабар берилганди.
Изоҳ (0)