“Auto.ru” saytida 1937-yilda ishlab chiqarilgan noyob Opel Olympia sotuvga qo‘yilgani to‘g‘risida e’lon paydo bo‘ldi. Moskvada saqlanayotgan kumushrang ikki eshikli mashina 999 ming rublga (13 ming dollar) baholanmoqda, deb yozadi Motor.
E’londa ko‘rsatilishicha, avtomobil xususiy kolleksionerga tegishli. Suratlarga ko‘ra, nemis sedanining kuzovi yaxshi ahvolda saqlangan. Olympia saloni suratga ko‘rinmagan: oynalar orqali faqat original rul chambaragini ko‘rish mumkin. Sotuvchining so‘zlariga ko‘ra, Opel’ga hozirga qadar ikki kishi egalik qilgan. Ta’kidlanishicha, avtomobil “rastomojka”dan o‘tgan, ta’mirtalab emas va original avtomobil pasportiga ega.
Olympia modeli 44 ot kuchiga ega 1,5 litrli benzin motor yordamida harakatga keladi. Dvigatel mexanik uzatmalar qutisi yordamida ishlaydi. Orqa uzatmali ikki eshikli model hozirga qadar 50 ming kilometr yo‘l bosgan.
Opel Olympia 1936-yili Berlinda o‘tkazilgan Olimpiada sharafiga nomlangan. U monokok kuzovga ega Germaniyadagi birinchi seriyali avtomobil hisoblanadi. Yagona po‘lat konstruksiya mashina og‘irligini boshqa romli modellarga qaraganda 150 kilogrammga yengillashtirish imkonini bergan.
Olympia’ni ishlab chiqarish 1935-yilda boshlangan, biroq Ikkinchi jahon urushi boshlanishida nemis armiyasining ehtiyojlari sabab to‘xtatilgan. Bundan tashqari, urush davomida Ryusselsxaymdagi Opel fabrikasiga jiddiy shikast yetgan. Ishlab chiqarish 1947-yilga borib qayta tiklangan va 1953-yilga qadar davom etgan. Biroq eskirgan model yangi Rekord’ga almashtirilgan. Olympia nomi 1967-yilga qayta tiklangan, ammo faqat uch yilga: 1970-yilda Opel lineykasidagi avtomobil o‘rnini Ascona egallagan.
Avvalroq Niderlandiyada Muammar Kaddafi buyurtmasiga asosan yaratilgani aytilayotgan Maybach 57S, amerikalik basketbolchi Kobi Brayantga tegishli bo‘lgan Chevrolet Impala, 20 yil davomida garajda qolib ketgan noyob BMW M1 sotuvga qo‘yilgani to‘g‘risida xabar berilgandi.
Izoh (0)