Toshkent xalqaro aeroportida xorijdan jami 135 gramm zargarlik buyumini protez orasiga berkitib, O‘zbekiston hududiga olib kirayotgan shaxslar qo‘lga olingan. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, Toshkent xalqaro aeroportiga xorijdan uchib kelgan yo‘lovchilar orasidagi shaxslardan birining “Yashil yo‘lak” orqali harakatlanayotib, bezovtalanishi bojxonachilarning diqqatini tortgan.
Shundan so‘ng ushbu shaxs bojxona postidagi bodi-skaner qurilmasi orqali ko‘zdan kechirilganida, o‘ng qo‘liga o‘rnatilgan protez orasiga 75 gramm og‘irlikdagi qiymati 23,6 million so‘mlik zargarlik buyumlari yashirilganligi fosh qilingan.
Shuningdek, ayni shu reysda uchib kelgan yana bir yo‘lovchi esa umumiy qiymati 15,8 million so‘mlik 58 gramm og‘irlikdagi zargarlik buyumlarini cho‘ntaklariga yashirgancha, “Yashil yo‘lak”dan o‘tmoqchi bo‘lgan vaqtida qo‘lga olingan.
Hozirda mazkur holatlar yuzasidan bojxona organlari tomonidan surishtiruv harakatlari davom ettirilmoqda.
Avvalroq Toshkentda soxta tilla taqinchoqlarni 29,3 million so‘mga sotgan ayollar qo‘lga olingani, shuningdek, buvisining tilla taqinchoqlari va pullarini o‘g‘irlagan 21 yoshli qizga jinoyat ishi qo‘zg‘atilgani to‘g‘risida xabar berilgandi.
Izoh (0)