Buxoroda piyodalar o‘tishi uchun belgilangan joydan yo‘lni kesib o‘tayotgan piyodaga yo‘l bermagan Spark haydovchisi jarimaga tortildi, deb xabar beradi IIV YHXBB axborot xizmati.
Ijtimoiy tarmoqda “Qoidabuzar Spark haydovchisi piyodani urib, tan jarohati yetkazishi mumkin edi” sarlavhasi ostidagi videolavha tarqaldi. Videolavhada 29-yanvar, juma kuni Buxoro shahar Ibn Sino ko‘chasida Spark rusumli, 80 M 469 KA davlat raqam belgili avtomobil piyodalar o‘tishi uchun belgilangan joydan yo‘lni kesib o‘tayotgan piyodaga yo‘l bermasdan, yo‘l-transport hodisasi yuzaga kelishi mumkin bo‘lgan harakatlar sodir etganligi aks etgan.
Ta’kidlanishicha, mazkur videolavha o‘rganilgan va Buxoro shahar IIO FMB YHXB xodimlari tomonidan surishtiruv ishlari olib borilgan.
Davlat raqami 80 M 469 KA bo‘lgan Spark avtomobil haydovchisi Q.S.ga Ma’muriy javobgarlik to‘g‘risidagi kodeksning 1285-moddasi (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi) 2-qismi tartibida ma’muriy bayonnoma rasmiylashtirilib, bazaviy hisoblash miqdorining o‘n baravari, ya’ni 2,23 million so‘m jarima jazosi belgilangan.
Avvalroq Buxoroda YPX inspektorini Tico kapotida sudrab ketgan haydovchi 15 sutkaga qamalgani to‘g‘risida xabar berilgandi.
Izoh (0)