Тошкент халқаро аэропортида хориждан жами 135 грамм заргарлик буюмини протез орасига беркитиб, Ўзбекистон ҳудудига олиб кираётган шахслар қўлга олинган. Бу ҳақда Давлат божхона қўмитаси матбуот хизмати хабар берди.
Маълум қилинишича, Тошкент халқаро аэропортига хориждан учиб келган йўловчилар орасидаги шахслардан бирининг «Яшил йўлак» орқали ҳаракатланаётиб, безовталаниши божхоначиларнинг диққатини тортган.
Шундан сўнг ушбу шахс божхона постидаги боди-сканер қурилмаси орқали кўздан кечирилганида, ўнг қўлига ўрнатилган протез орасига 75 грамм оғирликдаги қиймати 23,6 миллион сўмлик заргарлик буюмлари яширилганлиги фош қилинган.
Шунингдек, айни шу рейсда учиб келган яна бир йўловчи эса умумий қиймати 15,8 миллион сўмлик 58 грамм оғирликдаги заргарлик буюмларини чўнтакларига яширганча, «Яшил йўлак»дан ўтмоқчи бўлган вақтида қўлга олинган.
Ҳозирда мазкур ҳолатлар юзасидан божхона органлари томонидан суриштирув ҳаракатлари давом эттирилмоқда.
Аввалроқ Тошкентда сохта тилла тақинчоқларни 29,3 миллион сўмга сотган аёллар қўлга олингани, шунингдек, бувисининг тилла тақинчоқлари ва пулларини ўғирлаган 21 ёшли қизга жиноят иши қўзғатилгани тўғрисида хабар берилганди.
Изоҳ (0)