O‘zbekiston Sudyalar oliy kengashi matbuot xizmati Andijon viloyatidagi sudlardan birining raisi ishdan olinishi borasida tarqalgan gap-so‘zlar qanchalik haqiqatga mos kelishi haqidagi “Daryo” so‘roviga javob berdi.
“Daryo” manbasi 2020-yilning noyabr oyida Andijon viloyatidagi shahar sudlaridan birining raisi ishdan olingani, bunga esa sudyaning axloqsiz xatti-harakati sabab bo‘lgani haqida ma’lumot kelib tushdi.
Sudyalar oliy kengashi matbuot xizmati rahbari Tursunali Akbarovning “Daryo”ga ma’lum qilishicha, haqiqatan ham Andijon viloyatidagi shaharlardan birining sud raisi vazifasidan ozod etilgan.
“Bunga sobiq sud raisi sudyalik odob-axloqini buzgani sabab bo‘lgan. Biroq shaxsiy hayot daxlsizligi nuqtayi nazaridan sobiq sudyaning ism-sharifi va ishxonasining aniq manzilini ochiqlash maqsadga muvofiq emas”, – dedi Tursunali Akbarov.
Ma’lumot uchun, 2020-yilda jami 27 nafar sudyaning vakolati muddatidan ilgari tugatilib, lavozimidan ozod qilingan. Bunga uchta holatda sudyaning boshqa ishga o‘tgani (ular orasida respublika rahbarlik idoralarida mas’ul vazifaga tayinlangani ham bor), beshta holatda esa sudya o‘z xohishiga ko‘ra ishdan bo‘shash haqida ariza yozgani sabab bo‘lgan.
Shuningdek, sudyalik qasamyodi va odob-axloq qoidalarini hamda odil sudlovni amalga oshirishda qonun talablarini qo‘pol ravishda buzgan 12 nafar sudya tizimdan chetlatilgan. Ulardan biri jinoiy javobgarlikka tortilgan.
Mavzuga doir:
- Jinoiy ishlar bo‘yicha Chinoz tuman sudi raisi hibsga olindi
- Qarshida sudya 500 dollar pora bilan qo‘lga tushdi
- Toshkent viloyatida ozodlikni cheklash jazosini o‘tayotgan shaxsning ziyofatida qatnashgan sudyalar jarimaga tortilgan va lavozimi pasaytirilgan
- Urganch tumanlararo sudi sudyasi pora bilan qo‘lga tushdi
- Toshkentda 5 mingga yaqin soxta qaror chiqargan sudyalar ustidan qo‘zg‘atilgan jinoyat ishi bo‘yicha sud 11-dekabr kuni boshlanadi
Izoh (0)