Ўзбекистон Судьялар олий кенгаши матбуот хизмати Андижон вилоятидаги судлардан бирининг раиси ишдан олиниши борасида тарқалган гап-сўзлар қанчалик ҳақиқатга мос келиши ҳақидаги «Дарё» сўровига жавоб берди.
«Дарё» манбаси 2020 йилнинг ноябрь ойида Андижон вилоятидаги шаҳар судларидан бирининг раиси ишдан олингани, бунга эса судьянинг ахлоқсиз хатти-ҳаракати сабаб бўлгани ҳақида маълумот келиб тушди.
Судьялар олий кенгаши матбуот хизмати раҳбари Турсунали Акбаровнинг «Дарё»га маълум қилишича, ҳақиқатан ҳам Андижон вилоятидаги шаҳарлардан бирининг суд раиси вазифасидан озод этилган.
«Бунга собиқ суд раиси судьялик одоб-ахлоқини бузгани сабаб бўлган. Бироқ шахсий ҳаёт дахлсизлиги нуқтаи назаридан собиқ судьянинг исм-шарифи ва ишхонасининг аниқ манзилини очиқлаш мақсадга мувофиқ эмас», – деди Турсунали Акбаров.
Маълумот учун, 2020 йилда жами 27 нафар судьянинг ваколати муддатидан илгари тугатилиб, лавозимидан озод қилинган. Бунга учта ҳолатда судьянинг бошқа ишга ўтгани (улар орасида республика раҳбарлик идораларида масъул вазифага тайинлангани ҳам бор), бешта ҳолатда эса судья ўз хоҳишига кўра ишдан бўшаш ҳақида ариза ёзгани сабаб бўлган.
Шунингдек, судьялик қасамёди ва одоб-ахлоқ қоидаларини ҳамда одил судловни амалга оширишда қонун талабларини қўпол равишда бузган 12 нафар судья тизимдан четлатилган. Улардан бири жиноий жавобгарликка тортилган.
Мавзуга доир:
- Жиноий ишлар бўйича Чиноз туман суди раиси ҳибсга олинди
- Қаршида судья 500 доллар пора билан қўлга тушди
- Тошкент вилоятида озодликни чеклаш жазосини ўтаётган шахснинг зиёфатида қатнашган судьялар жаримага тортилган ва лавозими пасайтирилган
- Урганч туманлараро суди судьяси пора билан қўлга тушди
- Тошкентда 5 мингга яқин сохта қарор чиқарган судьялар устидан қўзғатилган жиноят иши бўйича суд 11 декабрь куни бошланади
Изоҳ (0)