UFC reytingni yangiladi. Konor Makgregor 2 pog‘ona pastladi, Porye — yengil divizion yetakchisi

O‘tgan haftada bo‘lib o‘tgan musobaqalardan keyin UFC reytingida qator o‘zgarishlar yuz berdi.

UFC 257 musobaqasining asosiy jangini boy bergan Konor Makgregor umumiy ro‘yxatda ikki pog‘ona pastladi va 15-o‘ringa tushib ketdi. Yengil vazn divizionida ham irlandiyalik sportchi ikki pog‘ona yo‘qotdi va 6-o‘rinda qayd etildi.

Konorni taslim etgan Dastin Porye yengil divizion yetakchiligini Jastin Getjidan tortib oldi. Chempion hamon Habib Nurmagomedov bo‘lib qolmoqda.

UFC’dagi debyut jangida Den Hukerni nokautga uchratgan Maykl Chendler yengil vazn toifasi reytingida birdaniga 4-o‘rinda qayd etildi. Huker esa 8-o‘ringa tushib ketdi.

Qayd etish joiz, yengil divizionda faqat Charlz Oliveyra (3), Toni Fergyuson (5) va Rafael dos Anyos (7) o‘z o‘rnini saqlab qoldi qolganlar esa kamida bir pog‘ona pastladi.

O‘zbekistonlik yakkakurashchi Zarruh Adashevni mag‘lubiyatga uchratgan Su Mudaerji mutlaq yengil vazn toifasida ilk bor reytingdan joy oldi — 14-o‘rin. Avvalroq Adashevni 32 soniya ichida nokautga uchratgan, biroq o‘tgan haftada Mett Shnellga yutqazib qo‘ygan Tayson Nem ikki pog‘ona pastlab 15-o‘rinda qayd etilgan.

Reytingning to‘liq natijalari bilan ushbu havola orqali tanishish mumkin.