Peru hududining uchdan bir qismida COVID-19 tarqalishi bilan bog‘liq vaziyatning yomonlashishi sababli 31-yanvardan izolyatsiya rejimi amal qilishni boshlaydi, deya xabar berdi “Interfaks”.
O‘nta hududda, shu jumladan, mamlakat poytaxti Limada do‘konlar 14-fevralga qadar yopiq bo‘ladi, aholi majburan uyda qoladi. Dorixona va banklar o‘z faoliyatini davom ettiradi, cherkovlar yopiladi.
Umuman olganda, chora-tadbirlar 16,4 million kishiga — mamlakat aholisining deyarli yarmiga ta’sir qiladi. Lokdaun joriy etilmagan boshqa hududlarda komendantlik soati o‘rnatilib, ommaviy tadbirlar taqiqlanadi.
So‘nggi kunlarda mamlakatda kasallanish bo‘yicha yangi holatlarning o‘rtacha o‘sish sur’ati kuniga 1000 dan 5000 gacha ko‘tarildi. Peruda pandemiya davomida 1,1 milliondan ortiq kishida COVID-19 kasalligi aniqlangan, 40 mingdan ortiq odam vafot etgan.
O‘tgan yili bahorda ham Peruda koronavirus tufayli qat’iy karantin joriy qilingandi.
Avvalroq Peruda sud Bill Geyts va Jorj Sorosni koronavirus pandemiyasini “yaratganlik”da ayblagani hamda bunday qaror chiqargan sudyalar ustidan tekshiruv o‘tkazilgani haqida xabar berilgandi.
Izoh (0)