Avtomobillarga gaz to‘ldirish kompressor shoxobchalari (AGTKSh) ishini sifatli tashkil etish, ularda avtotransportga xizmat ko‘rsatilishini yaxshilash maqsadida siqilgan gaz sotilishi hisobini yuritishning avtomatlashtirilgan tizimini joriy etish boshlandi. Bu haqda Energetika vazirligi matbuot xizmati xabar berdi.
Bugungi kunda O‘zbekistonda 1070 dan ziyod AGTKSh faoliyat yuritmoqda.
“AGTKShda o‘tkazilayotgan tekshiruvlar davomida gaz o‘lchash uskunasiga AGTKSh egalariga ‘foyda’ keltirishga xizmat qiladigan tashqi ta’sir o‘tkazish bilan bog‘liq holatlar aniqlanmoqda. Gazning bu tarzda talon-toroj qilinishi, shuningdek, ayrim AGTKShlarda mijozlarni jalb qilish uchun boshqalarga nisbatan narxlarni vaqtincha kamaytirish imkonini berib, bu esa avtotransport egalarida real narxlar borasida yanglish fikrlashiga olib keladi va odamlarning asossiz noroziliklariga sabab bo‘ladi”, — deyiladi xabarda.
Siqilgan gaz sotilishi hisobini yuritishning avtomatlashtirilgan tizimi transportirovka vaqtida olinayotgan va yuborilayotgan ma’lumotlarni aniq hisobga olish, gaz oqimi kirimi va chiqimini nazorat qilish imkonini bergani holda hisob jarayonida inson omilini bartaraf etishga xizmat qiladi.
Bundan tashqari, avtomatlashtirilgan tizimning joriy etilishi uyi AGTKSh yaqinida joylashgan iste’molchilarning doimiy ravishda gaz bosimi kamayib ketayotganligiga oid muammolarini bartaraf etishga xizmat qiladi.
“AGTKShlarda avtotransport vositalariga sotilgan gaz miqdorini onlayn nazorat qilish joriy etilgach, gaz o‘lchash uskunasi ishiga aralashish mumkin bo‘lmaydi”, — deya ta’kidlanadi xabarda.
Ta’kidlanishicha, yangi tizimning joriy etilishi Energetika vazirligiga gaz oqimini onlayn tartibda nazorat qilish, Davlat soliq qo‘mitasiga esa sotilayotgan mahsulot hisobini shaffof yuritish imkonini beradi.
Avvalroq O‘zbekistondagi gaz-zapravkalar faoliyatiga yana cheklov o‘rnatilgani, mas’ullar buni gaz bosimining pasayishi bilan izohlagani to‘g‘risida xabar berilgandi.
Izoh (0)