“Andijonnoma” tahririyati uchun vaqtincha joy topish ishlari boshlab yuborilgani aytilmoqda. Viloyat hokimligi yangi bino qurilganidan so‘ng tahririyat ko‘chirilishini aytgandi

“Andijonnoma” tahririyati o‘rnida Prezident maktabi qurilishi sababli tahririyat xodimlari ko‘chada qolishdan xavotirda ekanligi haqida xabar berilgan edi. Viloyat hokimligi xavotirga o‘rin yo‘qligini, tahririyat uchun Andijon shahri markazida barcha qulaylik va sharoitlarga ega, zamonaviy bino qurib bitkazilib, tahririyat ko‘chirib o‘tkazilgandan so‘ng qurilish ishlari amalga oshirilishini bildirgandi.

“Xabar.uz”ning yozishicha, mahalliy jurnalistlar va’dalar bajarilishiga shubha qilmoqda. “Achchiq tajribalar yo‘q emas-da. Masalan, uch oyda rekonstruksiya qilinishi ko‘zda tutilgan Bobur nomidagi viloyat axborot-kutubxona markazi qariyb ikki yildirki, tugallanmayapti. Noyob kitob fondi esa texnikumlarning birida, tiqilinch sharoitda zax bosgan holda saqlanmoqda. Kutubxonadan o‘quvchilar oyog‘i uzilgan, jamoaning ishlashi uchun sharoit yo‘q. Yozuvchilar uyushmasining viloyat bo‘limi ham xuddi shunday turar joysiz holatda kun ko‘rmoqda”, — deya bajarilmagan va’dalardan misol keltirilgan va “andijoncha spektakl”dan so‘ng viloyat mutasaddilariga nisbatan jamoatchilikda ishonch singani eslatib o‘tilgan.

“Tahririyat uchun ‘shahar markazida barcha qulaylik va sharoitlarga ega, zamonaviy bino qurib berilishi’ rost bo‘lsa, ‘Andijonnoma’ning pishiq va mustahkam binosini buzish o‘rniga shahar markazidagi o‘sha joyga Prezident maktabini qurish har tomonlama foydali emasmi? Budjetgayam, Prezident maktabining baxtiyor o‘quvchilarigayam...”, — deyiladi xabarda.

Shuningdek, tahririyat binosi va shahar hokimligi Navoiy shohko‘chasida joylashgani, bu yerdagi qatnov va tirbandliklar maktab o‘quvchilari uchun qo‘shimcha muammo tug‘dirishi, ayniqsa, ularning xavfsizligini katta so‘roq ostida qoldirishi hozirdan ma’lumligi ta’kidlangan.

“Xabar.uz” manbasiga ko‘ra, viloyat hokimligi tahririyat uchun vaqtincha joy topish ishlarini boshlab yuborgan. Bu rasmiy munosabatdagi va’dalarga bo‘lgan shubhani oshirayotgani, shuningdek, yangi bino qurilishlari “andijoncha tender”ga aylanib ketmasligiga ham kafolat yo‘qligi ta’kidlab o‘tilgan.