Автомобилларга газ тўлдириш компрессор шохобчалари (АГТКШ) ишини сифатли ташкил этиш, уларда автотранспортга хизмат кўрсатилишини яхшилаш мақсадида сиқилган газ сотилиши ҳисобини юритишнинг автоматлаштирилган тизимини жорий этиш бошланди. Бу ҳақда Энергетика вазирлиги матбуот хизмати хабар берди.
Бугунги кунда Ўзбекистонда 1070 дан зиёд АГТКШ фаолият юритмоқда.
«АГТКШда ўтказилаётган текширувлар давомида газ ўлчаш ускунасига АГТКШ эгаларига ‘фойда’ келтиришга хизмат қиладиган ташқи таъсир ўтказиш билан боғлиқ ҳолатлар аниқланмоқда. Газнинг бу тарзда талон-торож қилиниши, шунингдек, айрим АГТКШларда мижозларни жалб қилиш учун бошқаларга нисбатан нархларни вақтинча камайтириш имконини бериб, бу эса автотранспорт эгаларида реал нархлар борасида янглиш фикрлашига олиб келади ва одамларнинг асоссиз норозиликларига сабаб бўлади», — дейилади хабарда.
Сиқилган газ сотилиши ҳисобини юритишнинг автоматлаштирилган тизими транспортировка вақтида олинаётган ва юборилаётган маълумотларни аниқ ҳисобга олиш, газ оқими кирими ва чиқимини назорат қилиш имконини бергани ҳолда ҳисоб жараёнида инсон омилини бартараф этишга хизмат қилади.
Бундан ташқари, автоматлаштирилган тизимнинг жорий этилиши уйи АГТКШ яқинида жойлашган истеъмолчиларнинг доимий равишда газ босими камайиб кетаётганлигига оид муаммоларини бартараф этишга хизмат қилади.
«АГТКШларда автотранспорт воситаларига сотилган газ миқдорини онлайн назорат қилиш жорий этилгач, газ ўлчаш ускунаси ишига аралашиш мумкин бўлмайди», — дея таъкидланади хабарда.
Таъкидланишича, янги тизимнинг жорий этилиши Энергетика вазирлигига газ оқимини онлайн тартибда назорат қилиш, Давлат солиқ қўмитасига эса сотилаётган маҳсулот ҳисобини шаффоф юритиш имконини беради.
Аввалроқ Ўзбекистондаги газ-заправкалар фаолиятига яна чеклов ўрнатилгани, масъуллар буни газ босимининг пасайиши билан изоҳлагани тўғрисида хабар берилганди.
Изоҳ (0)