O‘zbekistonda gaz-zapravkalar 24 soat ishlay boshlagani, biroq, bu xursandchilik uzoq davom etmasligi ma’lum qilingandi. “Daryo” muxbirlarining xabar berishicha, ayrim viloyatlardagi gaz-zapravkalarda yana cheklov o‘rnatilgan.

Foto: “Daryo”

“Daryo”ning Qashqadaryo viloyatidagi muxbiri Otabek Qo‘ldoshevning ma’lumot berishicha, viloyatdagi mavjud 61 ta gaz zapravkada avtomobillarga gaz quyish vaqti tonggi 05:00 dan kech 17:00 ga qadar etib belgilangan.

“Qarshi grant tour” MChJ muassisligidagi gaz zapravka operatori Farhod To‘rayevning ma’lumot berishicha, “Hududgaz Qashqadaryo” gaz ta’minoti filiali topshirig‘iga ko‘ra, zapravka ish faoliyati soat 17:00 dan keyin to‘xtatilmoqda.

Foto: “Daryo”

“Shunaqa topshiriq bo‘lgan. Biz zapravkani yopmay ishlaymiz desak-da, gaz kelmay qoladi va baribir ishlolmaymiz”, — deydi Farhod To‘rayev.

Mazkur holatni izohlagan “Hududgaz Qashqadaryo” gaz ta’minoti filiali axborot xizmati mas’uli buni kunning sovishi va gaz bosimining pasayishi bilan bog‘ladi.

Foto: “Daryo”

“Ertaga, 27-yanvar kuni bu cheklov olib tashlanishi ham mumkin”, — deydi idora axborot xizmati vakili.

“Daryo” muxbiri kuzatuvlariga ko‘ra, viloyatdagi gaz zapravkalar faoliyatida cheklov o‘rnatilgan bo‘lsa-da, turnaqator navbatlar kuzatilmagan.

Foto: “Daryo”

“Sal avvalgi sovuqda judayam qiynalgandik. Boisi shaxsan menda yuk mashina bo‘lgani uchun olgan yuklarimizni vaqtida manziliga yetkazolmay, ko‘chada qolib ketgan holatlarimiz ham bo‘ldi. Zapravkalar faoliyatiga cheklov qo‘yilishi biz haydovchilar uchun judayam noqulay va nafaqat bizni, biz orqali aholini ham qiynab qo‘yish bo‘ladi”, — dedi haydovchi Ikrom Mamatov.

“Daryo”ning Namangan viloyatidagi muxbiri Azizbek Abduvaliyevning ma’lumot berishicha, Namangan viloyatidagi gaz zapravkalarida ham soat 17:00 dan tong 05:00 ga qadar cheklov o‘rnatilgan. Gaz idorasi mas’ullari bunga bosimning pasayishini sabab qilib keltirgan.

Foto: “Daryo”

Buxoro muxbiri Laylo Hayitovaning aytishicha, viloyatda bu borada umuman cheklov yo‘q.

“Hududgaz Buxoro” gaz ta’minoti filiali direktor o‘rinbosari O‘tkir Fayziyev “Daryo” muxbiri bilan suhbatda “Shuni alohida ta’kidlashim o‘rinliki, joriy yilning 14-yanvar kunidan boshlab, viloyatdagi mavjud 54 ta gaz quyish shoxobchasida 24 soat uzluksiz ishlash tartibi o‘rnatilgan. Viloyatdagi birorta zapravkada mashinalar turnaqatorligi yoki soatlab navbatda turish holati yuzaga kelgan emas”, — dedi.

Foto: “Daryo”

“Daryo”ning Samarqand viloyatidagi muxbiri Farhod Norbo‘tayevning ma’lum qilishicha, viloyatdagi gaz-zapravkalariga soat tonggi 05:00 dan 15:00 ga qadar ishlashga ruxsat berilgan.

“Havo haroratining keskin sovib ketishi bilan tabiiy gazga bo‘lgan talabning ikki hissa ortishi, ko‘p qavatli uylarda isitish tizimining to‘liq ishlamasligi va boshqa bir qator omillar sabab tabiiy gaz ta’minotida yuzaga kelgan muammolarni bartaraf etish maqsadida cheklov o‘rnatildi. Birinchi navbatda Samarqand viloyati aholisi va ijtimoiy soha obyektlarining tabiiy gazga bo‘lgan talabini qondirishimiz kerak. Shu sabab viloyatdagi gaz quyish shoxobchalariga tonggi soat 05:00 dan kunduzi 15:00 gacha ishlashga ruxsat berildi”, — deydi “Hududgaz Samarqand” gaz ta’minoti filiali matbuot xizmati rahbari Baxtigul Qarshiyeva

“Daryo”ning Andijon viloyatidagi muxbiri Umidjon Mamarasulovning xabar berishicha, viloyatdagi gaz to‘ldirish shoxobchalarida 22-yanvardan boshlab yana cheklovlar o‘rnatilgan bo‘lib, tonggi soat 05:00 dan kunduzi soat 15:00 gacha ishlash rejimiga o‘tkazilgan. Shunday bo‘lsa-da, 24—25-yanvar kunlari ham turnaqator navbatlar kuzatilmagan. Biroq, 26-yanvardan boshlab gaz-zapravkalar oldida navbatlar yuzaga kela boshlagan. Ayrim zapravkalarda esa kunduzi ham gaz yetkazib berishda soatlab uzilishlar kuzatilmoqda.

Haydovchilarning ma’lum qilishicha, turnaqator navbatlar sabab ular avtomobillarga gaz to‘ldirish uchun ikki-uch soat, ba’zida besh-olti soat vaqt sarflamoqda.

“Hududgaz Andijon” gaz ta’minoti filialida ishlovchi xodimlardan birining ma’lum qilishicha, viloyatga keluvchi tabiiy gaz bosimida pasayish kuzatilgani sababli gaz-zapravkalarida yana cheklovlar o‘rnatilgan.

Foto: “Daryo”

Eslatib o‘tamiz, Energetika vazirligi axborot xizmati rahbari Elmira Bekmurodova “Daryo”ga ob-havoning mo‘tadillashgani sababli 18-yanvardan boshlab hududlardagi gaz-zapravkalarning ishlash muddati mahalliy hokimliklar bilan kelishgan holda bosqichma-bosqich uzaytirila boshlanishini ma’lum qilgandi.

“Agar kunlar sovib, aholi gaz ta’minotida bosim kamayishi kuzatilsa, yana cheklov joriy qilinishi mumkin. Ya’ni bu chora to‘liq bekor qilinmagan. Faqat viloyat va tumanlardagi gaz ta’minotiga oid vaziyatga ko‘ra, ayni bir hududga xos tarzda hokimliklar bilan kelishgan holda qaror qabul qilinmoqda. Respublika miqyosida yakuniy qaror hali chiqarilmagan”, — degandi u.

Vazirlik axborot xizmati vakili Obidjon Dilmurodovning “Daryo”ga qo‘shimcha qilishicha, 18-yanvardan boshlab amalga tatbiq qilingan chora to‘liq bekor qilinmagan.

“Faqat viloyat va tumanlardagi gaz ta’minotiga oid vaziyatga ko‘ra, ayni bir hududga xos tarzda hokimliklar bilan kelishgan holda qaror qabul qilingan”, — deydi Obidjon Dilmurodov.

Obidjon Dilmurodovning ta’kidlashicha, shu kunlarda havo haroratining soviy boshlagani bois gaz bosimining pasayishi kuzatilmoqda. Shuning uchun birinchi navbatda aholi va ijtimoiy soha obyektlarini gaz bilan ta’minlash maqsadida tuman (shahar) hokimliklari bilan hududiy gaz ta’minoti korxonalari kelishgan holda reja-grafik asosida ushbu chora-tadbirlarni yana qayta joriy qilinmoqda.