Farg‘ona viloyatining Dang‘ara tumanida tabiiy gaz tarmog‘iga o‘zboshimchalik bilan ulangan ohak ishlab chiqarish sexlari faoliyati fosh etildi. Bu haqda “Daryo”ga Bosh prokuratura matbuot xizmati xabar berdi.
Ma’lum qilinishicha, “Dang‘aratumangaz” bo‘limi sobiq rahbari X.R. lavozimda ishlagan davrida mansab vakolatini suiiste’mol qilib, fuqaro A.Yu. va A.K. oldindan til biriktirib, “J.” fermer xo‘jaligida ohak mahsulotlari ishlab chiqaruvchi 2 ta sex tashkil etgan. Gaz yetkazib berish bilan bog‘liq hujjatlarni rasmiylashtirib, 112 ta qo‘lbola gaz yondirgichlarni umumiy foydalanishdagi tabiiy gaz tarmog‘iga o‘zboshimchalik bilan ulagan. Oqibatda gaz ta’minoti korxonasiga 74,7 million so‘m zarar yetkazgan.
“Dang‘aratumangaz” bo‘limi sobiq rahbari X.R. faoliyati davomida “J.” fermer xo‘jaligiga qarashli ohak sexida o‘zboshimchalik bilan tabiiy gaz tarmog‘iga ulanganligi yuzasidan rasmiylashtirilgan dalolatnomalar bo‘yicha 642,7 million so‘m zararni undirish choralarini ko‘rmaganligi aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) 3-qismi, 205-moddasi (hokimiyat yoki mansab vakolatini suiiste’mol qilish) 2-qismi bilan jinoyat ishi qo‘zg‘atilib, tergov harakatlari o‘tkazilmoqda.
Mazvuga doir:
- Asaka, Farg‘ona va Navoiyda 739 mln so‘mlik gazdan noqonuniy foydalanish holatlari fosh etildi
- Sergelidagi qozonxonada o‘rtacha 950 ta hovli uyning bir oylik ehtiyojini qondirishi mumkin bo‘lgan tabiiy gaz o‘g‘irlangani aniqlandi
- Toshkent viloyatida qariyb 3,2 mlrd so‘mlik gazdan noqonuniy foydalanish holati aniqlandi
Izoh (0)