Rossiyaning koronavirusga qarshi “Sputnik V” vaksinasi yo‘riqnomasining yangi tahririda ishlab chiqaruvchilar ogohlantirishicha, dori onkologik bemorlar uchun xavfli bo‘lishi mumkin. Bu haqda “Kommersant” xabar bermoqda. Immun tizimi kuchaytirilishi tufayli kasallik o‘tkirlashishi mumkin, deyiladi yo‘riqnomada.
“Ma’lumot yetarli emasligi sababli vaksinatsiya quyidagi bemorlar guruhlari uchun xavf tug‘diradi: autoimmun kasalliklari bo‘lgan (immun tizimining kuchaytirilishi kasallikning o‘tkirlashishiga olib kelishi mumkin, ayniqsa og‘ir va hayotga xavf soladigan holatlar rivojlanishiga moyillik bo‘lgan autoimmun patologiyasiga ega bemorlarga ehtiyotkorlik bilan munosabatda bo‘lish kerak); xavfli shishlari bo‘lgan bemorlar”, — deya nashr yo‘riqnomadan parcha keltirib o‘tadi.
Avvalroq Rossiya fanlar akademiyasi akademigi Aleksandr Karaulov vaksinatsiyaga qarshi ko‘rsatma sifatida birlamchi immunitet tanqisligi — 100 dan ortiq kamyob kasalliklardan iborat guruhni aytib o‘tgan edi. Gamaleya nomidagi markaz direktori Aleksandr Ginsburg “Sputnik V” jiddiy surunkali autoimmun kasalliklari bo‘lgan odamlarga, xususan, allergiya kuchaygan davrda mumkin emasligini qayd etgan edi.
Rossiyada koronavirusga qarshi ommaviy emlash 18-yanvar kuni boshlandi. Rossiyaliklar ikki xil mahalliy vaksina — “Sputnik V” va “EpiVakKorona” bilan emlanmoqda. Vaksinatsiya allaqachon 50 dan ortiq mamlakatda boshlangan. Butun dunyoda emlanganlikni tasdiqlash yagona tizimini joriy qilish masalasi ko‘rilmoqda.
Izoh (0)