Россиянинг коронавирусга қарши «Спутник V» вакцинаси йўриқномасининг янги таҳририда ишлаб чиқарувчилар огоҳлантиришича, дори онкологик беморлар учун хавфли бўлиши мумкин. Бу ҳақда «Коммерсантъ» хабар бермоқда. Иммун тизими кучайтирилиши туфайли касаллик ўткирлашиши мумкин, дейилади йўриқномада.
«Маълумот етарли эмаслиги сабабли вакцинация қуйидаги беморлар гуруҳлари учун хавф туғдиради: аутоиммун касалликлари бўлган (иммун тизимининг кучайтирилиши касалликнинг ўткирлашишига олиб келиши мумкин, айниқса оғир ва ҳаётга хавф соладиган ҳолатлар ривожланишига мойиллик бўлган аутоиммун патологиясига эга беморларга эҳтиёткорлик билан муносабатда бўлиш керак); хавфли шишлари бўлган беморлар», — дея нашр йўриқномадан парча келтириб ўтади.
Аввалроқ Россия фанлар академияси академиги Александр Караулов вакцинацияга қарши кўрсатма сифатида бирламчи иммунитет танқислиги — 100 дан ортиқ камёб касалликлардан иборат гуруҳни айтиб ўтган эди. Гамалея номидаги марказ директори Александр Гинцбург «Спутник V» жиддий сурункали аутоиммун касалликлари бўлган одамларга, хусусан, аллергия кучайган даврда мумкин эмаслигини қайд этган эди.
Россияда коронавирусга қарши оммавий эмлаш 18 январь куни бошланди. Россияликлар икки хил маҳаллий вакцина — «Спутник V» ва «ЭпиВакКорона» билан эмланмоқда. Вакцинация аллақачон 50 дан ортиқ мамлакатда бошланган. Бутун дунёда эмланганликни тасдиқлаш ягона тизимини жорий қилиш масаласи кўрилмоқда.
Изоҳ (0)