Yangi Zelandiyada ikki oy ichida birinchi marta koronavirusni yuqtirish holati aniqlandi, deb yozadi “TASS” COVID-19 bo‘yicha choralar vaziri Kris Xipkinzga tayanib. Virusga chalingan ayol Ispaniyadan uchib kelgan.
“Ehtimoliy koronavirusga chalinish holati tasdiqlandi. Infeksiya shtammi Janubiy Afrikaga xos bo‘lib, infeksiya manbasi davlat chegara izolyatorida bo‘lgan boshqa odam bo‘lishi kerak”, — dedi Xipkinz.
Uning qo‘shimcha qilishicha, mamlakatda 21-noyabrdan buyon birinchi marta qayd etilgan COVID-19’ga chalinish holati Yangi Zelandiyaga Ispaniyadan kelgan 56 yoshli ayol bilan bog‘liq.
Ayol Yangi Zelandiyaga kirib keluvchilar uchun majburiy karantinda vaqtida, Oklend davlat chegara izolyatorida virusni yuqtirgan. Xipkinz ta’kidlashicha, bemorda kasallik belgilari u karantindan keyin uyiga qaytgach paydo bo‘lgan.
Kasallangan ayol va uning oilasi a’zolari ayni paytda yakkalab qo‘yilgan.
Yangi Zelandiyada pandemiya boshidan buyon COVID-19’ga chalinish bilan bog‘liq 2288 ta holat qayd etilgan. 25 bemor virus asoratlaridan vafot etgan.
24-martdan mamlakatda qat’iy epidemik cheklovlar amal qilgan, ular 9-iyunda to‘liq bekor qilingan edi. Ayni paytda amalda bo‘lgan yagona sanitariya chorasi jamoat transportida va aviaparvozlar chog‘ida himoya niqoblarini taqish talabi hisoblanadi. Mamlakatga kelgan chet elliklar ikki hafta davomida davlat karantin markazlarida qolib, koronavirusga uch marta test topshirishi shart. May oyida Yangi Zelandiyada koronavirusga qarshi ommaviy emlash boshlanishi kutilmoqda.
Izoh (0)