Germaniyadagi keksa insonlar va nogironligi bo‘lgan shaxslarni parvarish qilish bilan shug‘ullanuvchi kompaniyalardan biri koronavirusga qarshi emlanishni istamagan yetti nafar xodimini ishdan bo‘shatdi, deb yozadi “Korrespondent.net”.
Bild gazetasining yozishicha, Germaniyada vaksinatsiya ixtiyoriy ravishda o‘tkazilmoqda va mazkur xodimlarning infeksiyaga qarshi emlanishdan bosh tortgani sabab ishdan bo‘shatilishi birinchi holat hisoblanadi.
“Keksalarni parvarish qilish bilan shug‘ullanuvchi kompaniya Rene Vilmerga tegishli — ishdan bo‘shatish to‘g‘risidagi qarorni aynan u qabul qilgan. Bundan oldin firma egasi emlanish bo‘yicha qaror qabul qilish uchun xodimlarga ikki kun muhlat bergan. Biroq ular rad etgan”, — deyiladi xabarda.
Uch nafar xodim vaksina olishdan bosh tortgan, yana to‘rt nafari esa belgilangan muddatda bir qarorga kelishga ulgurmagan. Natijada Vilmer ularning barchasini ishdan bo‘shatgan.
“Bemorlarimizni himoya qilish uchun qo‘limdan kelgan barcha ishni qilaman. Bu mening axloqiy burchim”, — deydi u.
Ta’kidlanishicha, bu kabi xatti-harakatidan so‘ng Vilmerga vaksinatsiyaga qarshi bo‘lganlar tomonidan tahdidlar kela boshlagan. Hatto erkakni o‘ldirish bilan qo‘rqitishgan.
Germanida koronavirusga qarshi vaksinatsiya dekabr oxirida boshlangan. Mamlakat 2020-yil oxirida BioNTech va Pfizer vaksinasidan 1,3 million doza olgan. 2021-yil boshida yana 4 million doza yetkazib berilishi rejalashtirilgan edi.
Mavzuga doir:
Izoh (0)