Ikki vazn toifasida UFC sobiq chempioni Konor Makgregor (22-4) Dastin Poryening (26-6) xayriya fondiga qancha mablag‘ o‘tkazgani ma’lum bo‘ldi.
UFC 257 musobaqasi doirasidagi nigohlar to‘qnashuv marosimi vaqtida Porye xayrli ishga qo‘l urib, o‘zining fondiga pul o‘tkazgani uchun Konorga minnatdorchilik bildirgandi.
Ma’lum bo‘lishicha, irlandiyalik yakkakurashchi Poryening fondiga 500 ming dollar o‘tkazgan. Buni Konorning jamoasi tasdiqladi. Pullar o‘tish jarayonida bo‘lib turibdi.
Ma’lumot uchun, Porye turmush o‘rtog‘i bilan birga “Yaxshilik uchun kurash” xayriya fondini tashkil qilgan. Dastin janglarda ishlatilgan buyumlarni (libos, qo‘lqop, kapa va boshqalar) auksionga qo‘yadi, ulardan tushgan mablag‘lar esa xayriya yo‘lida sarflanadi.
Eslatib o‘tamiz, Porye va Habib Nurmagomedov o‘zaro jangdan keyin bir-biri bilan libos almashgan, keyinchalik rossiyalik yakkakurashchi uni auksionga qo‘ygandi. Auksiondan tushgan pullarni (100 ming dollar atrofida) Habib Poryening fondiga o‘tkazib bergandi. Keyinchalik bu futbolka Toshkentdagi BeFit mashg‘ulot zalida saqlanayotgani ma’lum bo‘lgandi.
Makgregor Toshkent vaqti bilan 24-yanvar tongida UFC 257 musobaqasining asosiy jangida Dastin Poryega qarshi oktagonga ko‘tariladi. Musobaqa Toshkent vaqti bilan 05:00 da boshlanadi. Asosiy kard janglari esa 08:00 da boshlanishi (avvalgi janglar qanday yakunlanishiga qarab o‘zgarishi mumkin) rejalashtirilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)