Bosh vazir o‘rinbosari – Turizmni rivojlantirish davlat qo‘mitasi raisi Aziz Abduhakimov Ispaniyaga tashrifi doirasida qirol Filipp VI qabulida bo‘ldi, deya xabar qilmoqda qo‘mita matbuot xizmati.
Ispaniya qiroli Palacio Real de Madrid saroyida xorijiy delegatsiyalar rahbarlari sharafiga rasmiy qabul tashkillashtirdi. Marosimda turizm sohasining Ispaniya iqtisodiyotidagi muhim o‘rni, aholi bandligini ta’minlashdagi salmoqli hissasi qayd etilib, pandemiyadan keyin mamlakatni rivojlantirishda turizm va davlatlararo do‘stlikning alohida ahamiyat kasb etishi xususida so‘z yuritildi.
Rasmiy tadbirlardan so‘ng Ispaniya qiroli bilan O‘zbekiston delegatsiyasi rahbari o‘rtasida yuzma-yuz muloqot bo‘lib o‘tdi. Aziz Abduhakimov Ispaniya qiroli va uning oila a’zolari, shuningdek, ispan xalqiga O‘zbekiston Prezidenti Shavkat Mirziyoyev hamda o‘zbek xalqining salomini, samimiy tilaklarini yetkazdi.
Qirol Filipp VI, o‘z navbatida, 2017-yilning iyun oyida Shanxay hamkorlik tashkiloti sammiti doirasida Ostona shahrida Prezident Shavkat Mirziyoyev bilan bo‘lgan uchrashuvni iliq xotirladi.
“Ispaniya qiroli bugungi kunda Ispaniya va O‘zbekiston o‘rtasidagi do‘stona munosabatlar uzoq tarixga ega ekani, olti asr ilgari Ispaniya qiroli elchisi Rui Gonsales de Klavixoning Samarqandga amalga oshirgan tashrifi va Amir Temur bilan uchrashuviga borib taqalishini aytdi.
Ikki mamlakat o‘rtasidagi do‘stlik munosabatlarining davomi sifatida O‘zbekiston tomonidan Ispaniya kompaniyasining Talgo rusumli poyezdlari sotib olingani, ular asosiy turizm shaharlarini bog‘layotgani hamda yana yangi ikki poyezd olib kelish kabi rejalar qirolda katta qiziqish uyg‘otdi” – dedi Aziz Abduhakimov.
Shuningdek, Ispaniya qiroli pandemiya bilan bog‘liq vaziyat yumshaganidan so‘ng O‘zbekistonga rasmiy tashrif bilan borish istagi borligini bildirdi.
Avvalroq O‘zbekistonga 2020-yilda 1,5 mln nafar sayyoh tashrif buyurgani hamda Toshkentda uch yil ichida 66 ta mehmonxona va 12 ta savdo-ko‘ngilochar markazi qurish rejalashtirilgani haqida xabar berilgan edi.
Izoh (0)