Бош вазир ўринбосари – Туризмни ривожлантириш давлат қўмитаси раиси Азиз Абдуҳакимов Испанияга ташрифи доирасида қирол Филипп VI қабулида бўлди, дея хабар қилмоқда қўмита матбуот хизмати.
Испания қироли Палаcио Реал де Мадрид саройида хорижий делегациялар раҳбарлари шарафига расмий қабул ташкиллаштирди. Маросимда туризм соҳасининг Испания иқтисодиётидаги муҳим ўрни, аҳоли бандлигини таъминлашдаги салмоқли ҳиссаси қайд этилиб, пандемиядан кейин мамлакатни ривожлантиришда туризм ва давлатлараро дўстликнинг алоҳида аҳамият касб этиши хусусида сўз юритилди.
Расмий тадбирлардан сўнг Испания қироли билан Ўзбекистон делегацияси раҳбари ўртасида юзма-юз мулоқот бўлиб ўтди. Азиз Абдуҳакимов Испания қироли ва унинг оила аъзолари, шунингдек, испан халқига Ўзбекистон Президенти Шавкат Мирзиёев ҳамда ўзбек халқининг саломини, самимий тилакларини етказди.
Қирол Филипп VI, ўз навбатида, 2017 йилнинг июнь ойида Шанхай ҳамкорлик ташкилоти саммити доирасида Остона шаҳрида Президент Шавкат Мирзиёев билан бўлган учрашувни илиқ хотирлади.
«Испания қироли бугунги кунда Испания ва Ўзбекистон ўртасидаги дўстона муносабатлар узоқ тарихга эга экани, олти аср илгари Испания қироли элчиси Руи Гонсалес де Клавихонинг Самарқандга амалга оширган ташрифи ва Амир Темур билан учрашувига бориб тақалишини айтди.
Икки мамлакат ўртасидаги дўстлик муносабатларининг давоми сифатида Ўзбекистон томонидан Испания компаниясининг Талго русумли поездлари сотиб олингани, улар асосий туризм шаҳарларини боғлаётгани ҳамда яна янги икки поезд олиб келиш каби режалар қиролда катта қизиқиш уйғотди» – деди Азиз Абдуҳакимов.
Шунингдек, Испания қироли пандемия билан боғлиқ вазият юмшаганидан сўнг Ўзбекистонга расмий ташриф билан бориш истаги борлигини билдирди.
Аввалроқ Ўзбекистонга 2020 йилда 1,5 млн нафар сайёҳ ташриф буюргани ҳамда Тошкентда уч йил ичида 66 та меҳмонхона ва 12 та савдо-кўнгилочар маркази қуриш режалаштирилгани ҳақида хабар берилган эди.
Изоҳ (0)