Navoiyda aqli zaif ekanligi aytilayotgan fuqaroga azob berib, sodir bo‘lgan holat videosini internetda tarqatgan shaxs qo‘lga olindi. Bu haqda viloyat IIB axborot xizmati xabar berdi.
23-yanvar kuni Telegram’da Navoiy viloyatining Navbahor tumanida yashovchi, 2-guruh nogironi ekanligi aytilayotgan fuqaroning bo‘yniga arqon bilan azob berishgani tasvirlangan video tarqaldi.
Viloyat IIB tomonidan ushbu videolavhani o‘rganish davomida unda tasvirlangan fuqaro haqiqatan ham Navbahor tumani “Yangiyo‘l” mahallasida yashovchi 2-guruh nogironi Sh.U. ekani hamda holat 22-yanvar kuni soat 14:00 da sodir bo‘lgani aniqlangan.
“Mazkur videolavha fuqaro P.K tomonidan o‘zining yashash xonadonidagi molxonasida, shunchaki hazil uchun olingani va do‘stlariga tashlagani, ijtimoiy tarmoqlarga qanday chiqib ketganligidan xabari yo‘qligi aniqlandi”, — deyiladi xabarda.
Hozirda ushbu holat yuzasidan Navbahor tuman IIB xodimlari tomonidan surishtiruv ishlari olib borilmoqda.
Avvalroq Buxoroda 7 yoshli qizaloqni qiynoqqa solib, uning qo‘li va yuzlarini kuydirgan er-xotinga sud hukmi o‘qilgani, Toshkentda o‘z xotiniga bolasining axlatini yedirgan erkak 3 yilga ozodlikdan mahrum etilgani hamda Sergelida bir ayolni qiynab, uni tahqirlagan 3 nafar ayol qamoqqa olingani haqida xabar berilgandi.
Izoh (0)