Adliya vazirligi huzuridagi Davlat xizmatlari agentligi O‘zbekiston va AQSh prezidentlari nomidagi firmalar ro‘yxatdan o‘tgani haqidagi xabarlarga izoh berdi.
Gap Samarqand viloyatida ochilgan “Shavkat Miromonovich Mirziyoyev” oilaviy korxonasi va “Jo Bayden” MChJ haqida ketmoqda. Birinchisi 2020-yil 14-fevralda, ikkinchisi 2021-yilning 21-yanvarida, AQShning yangi prezidenti lavozimiga kirishgan kuni ro‘yxatdan o‘tgan.
Agentlik “Tadbirkorlik faoliyati erkinligining kafolatlari to‘g‘risida”gi qonunga binoan yuridik shaxslar o‘z tashkilotlari nomlarini mustaqil ravishda tanlash huquqiga ega ekanligini eslatadi.
Qayd etilishicha, 2017-yil 1-apreldan boshlab tadbirkorlik subyektlarini ro‘yxatdan o‘tkazish avtomatlashtirilgan tizim orqali amalga oshiriladi (shaxsiy ishtirokida yoki onlayn tarzda), unda kompaniyalar nomlarida ishlatilishi taqiqlangan so‘zlarning doimiy yangilanadigan ro‘yxati mavjud.
“Firma nomlari to‘g‘risida”gi qonun quyidagilardan foydalanishga yo‘l qo‘ymaydi:
- davlatning rasmiy nomi, xalqaro, hukumatlararo yoki nodavlat notijorat tashkilotining qisqartirilgan yoki to‘liq nomi;
- O‘zbekistondagi tarixiy yoki taniqli shaxsning belgilangan tartibda berilgan ruxsatisiz to‘liq yoki qisqartirilgan ismi;
- firma nomi egasi, faoliyat predmeti yoki uning ishlab chiqarilgan mamlakati to‘g‘risida noto‘g‘ri yoki iste’molchini chalg‘itishga qodir bo‘lgan belgilar;
- jamiyat manfaatlariga, insonparvarlik va axloq tamoyillariga zid bo‘lgan belgilar.
“Gazeta.uz” ma’lum qilishicha, Kattaqo‘rg‘ondagi “Shavkat Miromonovich Mirziyoyev” oilaviy korxonasi endi “Toshkent Chilonzor Trade” deb nomlanadi. Barcha rekvizitlar, faoliyat turi va ta’sischilar ro‘yxati o‘zgarishsiz qoldi.
Shuningdek, Samarqandning yana bir kompaniyasi – “Jo Bayden” endi “White Eagle 070” deb nomlanadi.
Ma’lumot uchun, 2019-yil avgustida esa Toshkentda “Lyubaya biznes xorosha” nomli mas’uliyati cheklangan jamiyat tashkil etilgan edi. KTYaDR ma’lumotlariga ko‘ra, korxona maishiy elektr tovarlar ulgurji savdosi bilan shug‘ullanadi.
2020-yil iyunida Surxondaryoda “Voy Mani Okaxonlarim” nomli, yirik shoxli qoramollarning sut beradigan zotlarini ko‘paytirish bilan shug‘ullanuvchi oilaviy korxona ro‘yxatdan o‘tkazilgan edi. Keyinchalik korxona nomi “Akbar Ali Adolat” deb o‘zgartirilgan. 2020-yil mayida Jizzax viloyatida “Vapshe malades bala” nomli keng assortimentdagi tovarlar ulgurji savdosi bo‘yicha agentlar faoliyati bilan shug‘ullanuvchi kompaniya ro‘yxatdan o‘tkazilgani ma’lum bo‘lgan edi.
Izoh (0)