Davlat xavfsizlik xizmati Surxondaryo viloyati boshqarmasi va Iqtisodiy jinoyatlarga qarshi kurashish departamentining hududiy boshqarmasi hamkorligida o‘tkazilgan tezkor tadbirda qalbaki kupyuralar tayyorlab, muomalaga chiqarishni rejalashtirgan shaxs qo‘lga olindi, deya xabar bermoqda “Daryo”ning huquq-tartibot organlaridagi manbasi.
Ma’lum bo‘lishicha, Termiz tumanida istiqomat qiluvchi, 1995-yilda tug‘ilgan M.X. o‘z jinoiy rejasini amalga oshirish uchun Termiz shahrida joylashgan ko‘p qavatli uylardagi xonadonlardan birini vaqtinchalik ijaraga oladi.
O‘tkazilgan tezkor tadbir davomida u ijaraga olgan xonadonda Acer rusumli noutbuk, Epson rusumli rangli printer hamda 4 dona 100 000 so‘mlik, 48 dona 50 000 so‘mlik, 12 dona 10 000 so‘mlik, jami 2 920 000 so‘m miqdoridagi qalbaki pullar borligi aniqlandi va ashyoviy dalil sifatida protsessual tartibda rasmiylashtirib olindi.
Hozirda mazkur holat yuzasidan Jinoyat kodeksining tegishli moddasiga asosan jinoyat ishi qo‘zg‘atildi.
Avvalroq Namanganda 50 ming va 100 ming so‘mlik kupyuralarni qalbakilashtirganlar, Samarqandda 100 ming so‘mlik kupyurani qalbakilashtirgan shaxslar hamda Kattaqo‘rg‘onda qalbaki 300 dollarni muomalaga kiritmoqchi bo‘lgan shaxs qo‘lga olingani haqida xabar berilgandi.
Izoh (0)