“Oksford ta’limini joriy qilmoqchimiz” — Shavkat Mirziyoyev Toshkentda Prezident universiteti ochilishini aytdi

Prezident Shavkat Mirziyoyev 15-yanvar, juma kuni Yunusobod tumani faollari bilan uchrashuvda yoshlar siyosatiga oid kelgusi rejalar xususida so‘z yuritarkan, Toshkent shahrida Prezident universiteti ochilishini ma’lum qildi. Bu haqda “Daryo” muxbiri Mirolim Isajonov xabar bermoqda.

“Oldimizga katta-katta rejalarni qo‘ydik. Biz Prezident universitetini quramiz. Oksford ta’limini birinchi marta O‘zbekistonda joriy qilmoqchimiz. Britaniyaning ta’lim sohasi dunyoda birinchi o‘rinda turadi. Yangi Prezident maktablarini qurib, faoliyatini yo‘lga qo‘ydik. Endi 8 ming talabaga mo‘ljallangan yangi Prezident universitetini ochamiz. Hamma domlalari chet eldan bo‘ladi. Nega? Chunki bolalarimiz chet elga ketib, ularning 50 foizi qaytib kelmayapti. ‘Eng katta aql’ ketyapti. Ularga u yerdagi sharoit yoqadi, oylik katta. Ammo endi men shu sharoitlarni yaratib, ularni o‘zimizda o‘qitmoqchiman. Ketmasin bolalarimiz. O‘zimizning hidimiz, o‘zimizning yostig‘imiz, o‘zimizning bozorimiz, o‘zimizning mozorimiz bor. Agar ular yonimizda o‘qisa, katta-katta natijalarga erishamiz”, — dedi Prezident.

Tadbirda universitetning ochilish sanasi haqida xabar berilmagan.