Давлат хавфсизлик хизмати Сурхондарё вилояти бошқармаси ва Иқтисодий жиноятларга қарши курашиш департаментининг ҳудудий бошқармаси ҳамкорлигида ўтказилган тезкор тадбирда қалбаки купюралар тайёрлаб, муомалага чиқаришни режалаштирган шахс қўлга олинди, дея хабар бермоқда «Дарё»нинг ҳуқуқ-тартибот органларидаги манбаси.
Маълум бўлишича, Термиз туманида истиқомат қилувчи, 1995 йилда туғилган М.Х. ўз жиноий режасини амалга ошириш учун Термиз шаҳрида жойлашган кўп қаватли уйлардаги хонадонлардан бирини вақтинчалик ижарага олади.
Ўтказилган тезкор тадбир давомида у ижарага олган хонадонда Acer русумли ноутбук, Epson русумли рангли принтер ҳамда 4 дона 100 000 сўмлик, 48 дона 50 000 сўмлик, 12 дона 10 000 сўмлик, жами 2 920 000 сўм миқдоридаги қалбаки пуллар борлиги аниқланди ва ашёвий далил сифатида процессуал тартибда расмийлаштириб олинди.
Ҳозирда мазкур ҳолат юзасидан Жиноят кодексининг тегишли моддасига асосан жиноят иши қўзғатилди.
Аввалроқ Наманганда 50 минг ва 100 минг сўмлик купюраларни қалбакилаштирганлар, Самарқандда 100 минг сўмлик купюрани қалбакилаштирган шахслар ҳамда Каттақўрғонда қалбаки 300 долларни муомалага киритмоқчи бўлган шахс қўлга олингани ҳақида хабар берилганди.
Изоҳ (0)