Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol qo‘lga olindi

Samarqand viloyat IIB Jinoyat qidiruv boshqarmasi Korrupsiya va iqtisodiy jinoyatlarga qarshi kurashish bo‘limi xodimlari harbiy ta’lim muassasalariga o‘qishga kiritishni va’da qilib, fuqarolardan pul talab qilgan ayolni qo‘lga oldi. Bu haqda “Daryo”ga viloyat IIB axborot xizmati ma’lum qildi.

Ta’kidlanishicha, 2021-yilning 14-yanvar kuni viloyat IIBga Pastdarg‘om tumanida yashovchi T.M. murojaat qilib, Ya.Z. ismli ayol uni tanishlari orqali Ichki ishlar vazirligi akademiyasiga, ukasini esa Toshkent shahridagi Temurbeklar maktabiga o‘qishga kiritib berishini va’da qilib, evaziga 2020-yilning iyul oyidan noyabr oyiga qadar 3 ming dollar pullarni olib, o‘qishga kiritmasdan, yana 400 dollar talab qilayotganini bildirgan.

Mazkur arizaga asosan, 2021-yilning 14-yanvar kuni viloyat IIB JQB Korrupsiya va iqtisodiy jinoyatlarga qarshi kurashish bo‘limi xodimlari tomonidan tezkor tadbir o‘tkazilib, Ya.Z. ariza muallifidan 400 dollarni olgan vaqtida ashyoviy dalillar bilan ushlangan.

Olib borilgan tezkor surishtiruvlardan so‘ng gumondor bir nechta fuqarolardan, jumladan, B.F.dan 2020-yil dekabr oyida Milliy gvardiya institutiga kiritib qo‘yish evaziga 2500 dollarga kelishib, oldindan 400 dollar olgani, fuqaro T.D.dan esa 2020-yilning noyabr oyida o‘g‘lini Temurbeklar maktabiga o‘qishga kiritish evaziga 2000 dollar olganligi, N.R.dan esa 2020-yil avgust—sentabr oylarida ikki nafar farzandini Temurbeklar maktabiga o‘qishga kiritib qo‘yish evaziga 5000 dollar pulni firibgarlik yo‘li bilan qo‘lga kiritganligi aniqlangan.

Mazkur holat yuzasidan Pastdarg‘om tumani IIB huzuridagi tergov bo‘limi tomonidan tergovga qadar tekshiruv harakatlari olib borilmoqda.